QR ekologııa, geologııa jáne tabıǵı resýrstar mınıstri Maǵzum Myrzaǵalıev TMD-ǵa qatysýshy elderdiń Memleketaralyq ekologııalyq keńesiniń tóraǵasy bolyp saılandy, dep habarlaıdy Egemen.kz mınıstrlik saıtyna silteme jasap.
«2021 jylǵy 3 qyrkúıekte onlaın formatta TMD-ǵa qatysýshy memleketterdiń Memleketaralyq ekologııalyq keńesiniń VII otyrysy ótti. Qatysýshylar Keńestiń jańa tóraǵasyn saılady, ol QR ekologııa, geologııa jáne tabıǵı resýrstar mınıstri Maǵzum Myrzaǵalıev boldy», delingen QR Ekologııa mınıstrligi baspasóz qyzmetiniń habarlamasynda.
Otyrysqa TMD memleketaralyq ekologııalyq keńesine qatysýshy memleketterdiń – Armenııa, Belarýs, Qazaqstan, Qyrǵyzstan, Moldova, Reseı, Tájikstan jáne О́zbekstan Respýblıkasynyń delegasııalary, TMD elderiniń Parlamentaralyq Assambleıasy Keńesi Hatshylyǵynyń, TMD Elektr energetıkalyq Keńesiniń Atqarýshy komıtetiniń, Táýelsiz Memleketter Dostastyǵynyń Atqarýshy komıtetiniń ókilderi qatysty.
Otyrys barysynda qatysýshy elder qorshaǵan ortany qorǵaý salasyndaǵy yntymaqtastyqtyń jaı-kúıi men damý perspektıvalary máselelerin talqylady.
«Sondaı-aq polımerlik qaptamany paıdalanýdan ekologııalyq qaýipsiz qaptamany paıdalanýǵa kezeń-kezeńmen kóshý, parnıktik gazdar shyǵaryndylaryn satý júıesi, TMD aýmaǵynda qorshaǵan ortany qorǵaý salasynda, sondaı-aq balyq sharýashylyǵyn (akvaósirý) damytý salasynda turaqty damý maqsattaryn engizý máseleleri boıynsha tájirıbe almasý ótti», delingen habarlamada.
Qazaqstan parnıktik gazdar shyǵaryndylaryn saýdalaý júıesiniń tájirıbesimen bólisti. QR jańa ekologııalyq kodeksiniń sheńberinde Parıj kelisimi mindettemeleriniń oryndalýyn qamtamasyz etý maqsatynda parnıktik gazdar shyǵaryndylary men sińirýleri salasyndaǵy memlekettik retteý júıesi jetildirildi. Osylaısha, 2021 jyldan bastap kómirtegi bıýdjeti jyl saıyn 1990 jylǵy kómirtegi bıýdjetiniń deńgeıinen 1,5%-ǵa qysqaratyn bolady.
Qazaqstandyq tarap qorshaǵan ortany qorǵaý salasyndaǵy turaqty damý maqsattaryn engizý tájirıbesimen almasý nátıjeleri jáne balyq sharýashylyǵyn damytý salasyndaǵy yntymaqtastyq týraly aıtyp berdi.
Keńes barysynda TMD AAEJ-ǵa múshe memleketter qorshaǵan ortany qorǵaý salasyndaǵy ózekti máseleler boıynsha yntymaqtastyqty jalǵastyrýǵa ýaǵdalasty.
Otyrys qorytyndysy boıynsha TMD-ǵa qatysýshy memleketterdiń Memleketaralyq ekologııalyq keńesiniń 2022-2023 jyldarǵa arnalǵan jumys jospary bekitildi, sheshimder qabyldandy jáne otyrys hattamasyna qol qoıyldy.