Prezıdent Qasym-Jomart Toqaev jańa joldaýynda Kendirlide sý tushytý zaýytynyń salynatynyn aıtty, dep habarlaıdy Egemen.kz Mańǵystaý oblysy ákimdiginiń baspasóz qyzmetine silteme jasap.
Oblys ákimi S.Trumovtyń baıandaýynsha, bul zaýyttyń tehnıkalyq-ekonomıkalyq negizdemesi jasaldy. Jobany iske asyratyn «Aqsý» mekemesi quryldy. Quny 87 mlrd.teńge bolatyn joba táýligine 50 myń tekshe metr sý tushytady dep josparlanyp otyr. Kásiporyn iske qosylǵanda 160 myńdaı turǵyny bar Jańaózen qalasyn úzdiksiz sýmen qamtýǵa múmkindik bermek. Qazir jobanyń jobalyq-smetalyq qujaty jasaqtalýda. Bul jumys aıaqtalǵan soń zaýyt qurylysy bastalady.
«Kópten kútken máseleniń sheshilýine jol ashqan memleket basshysyna Mańǵystaý jurtshylyǵynyń atynan alǵys aıtamyn», dedi óńir basshysy.