«Nurly jer»: Bıyl elordada 25 kóppáterli turǵyn úı kesheni jóndeledi

«Elordamyzdyń kvartaldaryna keshendi renovasııa júrgizýdi jalǵastyramyz. Turǵyn úı qoryn jańartyp, qalpyna keltirip jatyrmyz. Qalada problemalyq turǵyn úı keshenderi bar ekeni qupııa emes: qasbettik bóligi boıynsha da, úılerdiń shatyry boıynsha da jáne t.b. Tek «Nurly jer» turǵyn úı-kommýnaldyq damý memlekettik baǵdarlamasynyń jelisi boıynsha ǵana bıyl 25 kóppáterli turǵyn úı keshenin jóndeımiz, 34 lıftini aýystyramyz.

Foto: Aleksandr Kýprıenko

Búgin qalany aralaý barysynda Baıqońyr aýdanyndaǵy (Jubanov kóshesi) birqatar turǵyn úı keshenine jóndeý júrgizý jumystarynyń barysymen tanystym. Úılerde shatyrdy, qasbetti, kireberisterdi jóndeý, ınjenerlik jelilerdi aýystyrý jáne jańartý jumystary júrgizilýde. Osylaısha, kúrdeli jóndeý júrgizý turǵyndar úshin úılerde jaıly turýǵa múmkindik berip qana qoımaı, turǵyn úı kesheniniń kelbetin jaqsartady.

О́tken jyly ózge baǵdarlamalarmen birge 50 kóppáterli qaýipti turǵyn úı kesheni jóndeldi, onyń ishinde halyq arasynda tanymal «Orbıta» apatty turǵyn úı kesheni de boldy. Sondaı-aq, jel kezinde ushatyn plıtalarymen «tanymal» «Terrıtorııa komforta-2» boldy.

Foto: Aleksandr Kýprıenko

Baǵdarlama aýqymdy bolmaq. Kelesi jyly «Nurly jer» turǵyn úı-kommýnaldyq damý baǵdarlamasy boıynsha ǵana 25 KTK astam jóndeý jumystaryn júrgizip, 30-dan astam lıftini aýystyrýdy josparlap otyrmyz. Sondaı-aq, turǵyn úıdi jóndeý boıynsha birqatar basqa baǵdarlamalar bar.

Turǵyn úı keshenin jóndeýmen qatar, aýlalardy abattandyrý boıynsha da jumystar júrgizemiz: jaıly aýla alańdaryn salý, sondaı-aq kvartalishilik joldardy asfalttaý, jeliler tartý jáne t.b. Úıinen shyqqan soń turǵyndar aldymen aýlaǵa aıaq basady. Munda taza aýada jaıly ýaqyt ótkizý úshin jaǵdaı jasaý óte mańyzdy. Eki jyl ishinde 400 aýla men qoǵamdyq keńistik salynyp, jóndeldi. Aýlalardy qurý prosesine de turǵyndardy tartamyz. Aýlanyń qandaı bolatynyn qala turǵyndary sheshedi», dep jazdy elorda ákimi.