Brıtandyq aqyndar Shon O’Braıen men Djon Bernsaıd II dárejeli «Dostyq» ordenimen marapattaldy. Qurmetti ataq el Prezıdenti Qasym-Jomart Toqaevtyń Jarlyǵymen Qazaqstan men Ulybrıtanııa jáne Soltústik Irlandııa Qurama Koroldigi arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin, sondaı-aq qazaqtyń uly aqyny, fılosof jáne aǵartýshysy Abaı Qunanbaıulynyń murasyn halyqaralyq arenada ilgeriletýge sińirgen eńbegi úshin berildi.
Eki aqyn Abaı shyǵarmalarynyń aǵylshyn tilindegi alǵashqy tolyq jınaǵyn Kembrıdj ýnıversıteti baspasynda daıyndap, basý jobasyna tikeleı atsalysqan. «Ulttyq aýdarma bıýrosy» QQ-men (UAB) seriktestikte júzege asyrylǵan joba sheńberinde brıtandyq aqyn professor Sh.O’Braıen Abaı poezııasynyń aýdarmasyn daıyndasa, qarasózderin shotland aqyny, professor Dj.Bernsaıd tárjimalady. Aıta keteıik, aǵylshyn tilindegi basylym – qazaq aqynynyń shyǵarmalaryn álemniń on tilinde jarııalaý jónindegi UAB-nyń aýqymdy jobasynyń bir bóligi edi.
Ordenderdi tabystaý rásiminde Qazaqstannyń Ulybrıtanııadaǵy elshisi Erlan Ydyrysov Qazaqstan Táýelsizdiginiń 30 jyldyǵyn merekeleý jylynda joǵary nag- radalardy ıelenýdiń sımvoldyq máni bar ekenin aıtty. Ol sondaı-aq Dj.Bernsaıd pen Sh.O’Braıenniń jahandyq aǵylshyntildi aýdıtorııa arasynda Abaı murasyn tanymal etýge jáne eki el mádenıetin ózara jaqyndastyrý isine qosqan zor úlesterin atap ótti.
Professor Shon O’Braıen – brıtandyq aqyn, synshy, dramatýrg. Elıot, «Forward Prize», Somerset Moem syılyqtarymen marapattalǵan. Al professor Djon Bernsaıd – shotland aqyny jáne jazýshysy, Sent-Endrıýs ýnıversıtetiniń aǵylshyn tili professory. Poezııa men prozanyń birqatar jınaǵyn jarııalaǵan. Elıot, «Forward Prize», O.Genrı syılyqtarynyń laýreaty. Onyń shyǵarmalarynyń aýdarmalary Germanııa, Fransııa, Ispanııa, Italııa, Túrkııa, Nıderland, QHR, Indonezııa, Horvatııa, Brazılııa jáne Argentınada basylǵan.