14-25 qyrkúıek aralyǵynda «Saryshaǵan» polıgonynda TMD elderiniń «Jaýyngerlik dostastyq-2021» oqý-jattyǵýy ótedi, dep jazady Egemen.kz.
Sharaǵa Áýe shabýylyna qarsy qorǵanys áskerleri men Áskerı-áýe kúshterinen 1 300-den astam áskerı qyzmetshi jáne 400-ge jýyq qarý-jaraq pen áskerı tehnıka jumyldyrylady. Atap aıtqanda, S-300PS, S-75, S-125, «Kýb», «Býk-M2e» zenıttik-zymyran keshenderi, radıoelektrondyq kúres bólimsheleriniń tehnıkasy, Sý-30SM, Sý-27 kópfýnksıonaldy joıǵyshtary, sondaı-aq S-295 áskerı-kólik ushaqtary, L-39 jańǵyrtylǵan jaýyngerlik oqý-jattyǵý ushaqtary, Mı-171Sh, ES-145 tikushaqtary jáne ushqyshsyz ushý apparattary bar.
Qorǵanys mınıstrligi baspasóz qyzmetiniń habarlaýynsha, oqý-jattyǵý kezinde ShQQ jaýyngerlik eseptoptary zenıttik-zymyran keshenderinen is júzinde oq atady. Áskerı avıasııa ekıpajdary áýedegi jáne jerdegi nysanalardy avıasııa quraldaryn urysta qoldaný arqyly zaqymdaı otyryp, kúndizgi jáne túngi ushýlardy pysyqtaıdy.
«Oqý-jattyǵý áskerı basqarý organdarynyń daıyndyq deńgeıin, jaýyngerlik eseptoptar men ekıpajdardyń úılesimdiligin arttyrý, sondaı-aq áýe shabýylyna qarsy jáne áýede shaıqastardy júrgizý tásilderin pysyqtaý maqsatynda ótkiziledi. Qarýly qaqtyǵystarda avıasııa men áýe shabýylyna qarsy qorǵanys áskerlerin qoldanýdy uıymdastyrý boıynsha túrli taktıkalyq epızodtar kórsetiledi», dep atap ótti Áýe qorǵanysy kúshteri Bas shtabynyń bastyǵy general-maıor Fazylolla Bádenov.