Bokstan Qazaqstannyń erler men áıelder ulttyq quramasynyń jańa bas bapkerleri taǵaıyndaldy, dep jazady Egemen.kz Qazaqstandyq boks federasııasynyń resmı saıtyna silteme jasap.
Erler quramasyn Qaırat Sátjanov basqarady.
Sátjanovtyń jattyqtyrýshylyq ótili - 31 jyl. 2011 jyldan 2019 jylǵa deıin Qazaqstan jasóspirimder quramasynyń aǵa jattyqtyrýshysy bolyp jumys istedi. Osy ýaqyt ishinde onyń boksshylary eki ret «Azııa balalary» halyqaralyq oıyndarynyń medaldyq kestesin jeńip aldy, eki ret álem chempıonattarynyń úzdik úshtigine kirdi, sonymen qatar Azııa chempıonatynda eki ret jeńiske jetti.
2019 jyly Sátjanov Qazaqstan jastar quramasynyń bas jattyqtyrýshysy bolyp taǵaıyndaldy. Eki jyl ishinde onyń shákirtteri Azııa chempıonatynda eki ret komandalyq esepte jeńiske jetti jáne álem chempıonatynda ekinshi orynǵa ıe boldy.
Bokstan Qazaqstan áıelder quramasynyń jańa bas bapkeriniń esimi de belgili boldy. Shamıl Safıýllın óz ótinishi boıynsha ketken Erik Alǵabektiń ornyna taǵaıyndaldy.