COVID-19 taralýyna jol bermeý jónindegi VAK álem elderindegi epıdemıologııalyq ahýalǵa sholý jasady, dep jazady Egemen.kz.
Bolgarııa Úkimeti COVID-19 aýrýynyń ósýine baılanysty jańa shekteýler engizdi. Karantın sharalary qazan aıynyń sońyna deıin sozylady. Búginnen bastap elde kez kelgen buqaralyq is-sharalardy ótkizýge tyıym salyndy. Balalardyń oıyn-saýyq ortalyqtary men klýbtar jumys istemeıdi, úı-jaılardaǵy sporttyq jarystar kórermensiz ótkiziledi. Tamaqtaný oryndaryna tek 23:00-ge deıin jumys isteýge ruqsat etiledi. Túngi klýbtar men bı alańdarynyń jumysy toqtaıdy. Kınoteatrl, teatr jáne konsert zaldaryna kórermen zalyn 50% toltyrýǵa ǵana ruqsat etiledi. Jumys berýshilerge qyzmetkerlerdiń jartysyn qashyqtan jumys rejımine aýystyrý usynyldy.
COVID-19 vırýsyna qarsy vaksınasııalanǵan sheteldikterge Kanada shekaralary ashyq. El Úkimeti koronavırýsqa qarsy vaksınasııanyń tolyq kýrsynan ótken azamattardy elge kirgizý týraly sheshim qabyldady. Bul jerde amerıkandyq Pfizer, Moderna, Johnson & Johnson kompanııalary men Brıtandyq-shvedtik AstraZeneca fırmasynyń preparattarymen vaksınasııalanǵandar týraly aıtylyp otyr. Vaksınasııa pasportynan basqa, týrıster 72 saǵattan keshiktirmeı teris nátıjeli test anyqtamasyn usynýy kerek. Sonymen birge Úndistan men Marokkodan kelgen jolaýshylarǵa elge kirýge tyıym salynady.
Vetnamda koronavırýstyń taralýyna qarsy turý úshin engizilgen lokdaýn eń iri qalasynyń turǵyndarynyń ashyǵýyna ákep soqtyrdy. Tolyq oqshaýlanýdyń saldary aýqatsyz qalýǵa májbúr etti. Munda 9 mıllıon adam turady jáne qala pandemııa epısentrinde boldy. Elde 520 myń adam koronavırýs juqtyrǵan, 13 myńnan astam adam qaıtys boldy, olardyń 80%-y Hoshımınde. Covid-19 aýrýy dıagnozy qoıylǵan jáne olarmen baılanysta bolǵan turǵyndarǵa úıinen shyǵýǵa tyıym salynady. Barlyq jerde baqylaý-ótkizý pýnktteri ornatylǵan, al aýrý men ólim-jitim kórsetkishteri áli de joǵary.
AQSh koronavırýstyń taralýy boıynsha aldyńǵy orynnan túspeı keledi. О́tken aptada munda SARS-CoV-2 vırýsynyń 1 mıllıonnan astam tasymaldaýshysy anyqtaldy. Statıstıka AQSh-taǵy syrqattanýshylyq kórsetkishteriniń qysqy órshý kezindegi (2020/2021) jaǵdaılarǵa oraldy dep boljaıdy. Ol kezeńderde elde ár tórt kún saıyn mıllıon jańa jaǵdaı anyqtalǵan bolatyn. Pandemııa kezinde AQSh-ta 40 mıllıon COVID-19 juqtyrý jaǵdaılary tirkeldi, 648,9 myń adam aýrý saldarynan qaıtys boldy.
Reseılik ǵalymdar 30 mınýttan az ýaqyt ishinde COVID-19 vırýsynyń aǵzada bar-joǵyn anyqtaıtyn qurylǵy oılap tapty. Federaldy bıomedısınalyq agenttiktiń mamandary SARS-CoV-2 mýtasııasyn jyldam baqylaýdyń jolyn tapty, ıaǵnı koronavırýstyń mańyzdy qasıetterine jaýap beretin genomnyń tek bir bóligin «oqýdy» usynady.