Túrikmenstan prezıdenti Gýrbangýly Berdimuhamedov jaqyn arada О́zbekstanǵa resmı saparmen barady. Is-sapar barysynda yntymaqtastyq týraly qujattar paketine qol qoıylady. Bul týraly Berdimuhamedov jumys beınekonferensııasy barysynda aıtty, dep habarlaıdy Egemen.kz Túrkimenstan memlekettik aqparat agenttigine silteme jasap.
G.Berdimuhamedov Premer-Mınıstrdiń orynbasary Esenmyrat Orazgeldıevke aldaǵy aptada qol qoıýǵa daıyndalyp jatqan saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi qujattardy Túrikmen-О́zbekstan birlesken komıssııasynyń aldaǵy otyrysynda ózbekstandyq áriptesimen talqylaýdy tapsyrdy.
G.Berdimuhamedov sońǵy ret О́zbekstanǵa 2019 jyldyń qarashasynda kelgen. Sondaı-aq 2021 jyldyń tamyzynda eki el basshylary Kaspıı teńizi jaǵalaýyndaǵy «Avaza» ulttyq týrıstik aımaǵynda Ortalyq Azııa elderi prezıdentteriniń úshinshi konsýltatıvtik kezdesýi aıasynda júzdesken.