Parlament Májilisiniń jalpy otyrysynda «Kaspıı teńiziniń teńiz ortasyn qorǵaý jónindegi negizdemelik konvensııaǵa qorshaǵan ortaǵa transshekaralyq turǵydan jasalatyn áserdi baǵalaý jónindegi hattamany ratıfıkasııalaý týraly» zań jobasy maquldandy, dep jazady Egemen.kz.
«Bul qujat elimiz úshin óte mańyzdy. Osy sý basseıinindegi ekologııalyq ári bıologııalyq resýrstaryn saqtaý máselesi ózekti. Sebebi Kaspıı teńizinde kómirsýtegi shıkizatynyń iri qory bar. Qorshaǵan ortany qorǵaý salasyndaǵy yntymaqtastyqty nyǵaıtý maqsatynda Qazaqstan Negizdemelik konvensııaǵa qatysty birqatar hattamalarǵa qol qoıdy. Solardyń biri – Kaspıı mańy memleketteri 2018 jylǵy 20 shildedegi Máskeýde qol qoıǵan qorshaǵan ortaǵa áserdi baǵalaý jónindegi hattama», dedi Ekologııa, geologııa jáne tabıǵı resýrstar mınıstri Maǵzum Myrzaǵalıev.
Atalǵan qujatty Ázerbaıjan, Iran, Qazaqstan, Reseı jáne Túrikmenstan elderi qabyldaǵan.
Mınıstrdiń aıtýynsha, hattamany retteýge jatatyn qyzmet túrlerine: munaı óńdeý zaýyttary, jylý qýaty 300 megavatt nemese odan joǵary jylý elektr stansııalary men basqa da jaǵý qondyrǵylary, atom elektr stansııalary, avtomobıl joldaryn salý, rekonstrýksııalaý jáne keńeıtý jatady.
Sonymen qatar konvensııa erejelerin iske asyrý úshin jańa Ekologııa kodeksinde transshekaralyq ekologııalyq áserdi retteý, olardy júzege asyrý tártibi, quqyqtary men mindetteri qarastyrylǵan.
Mınıstrdiń málimdeýinshe, qoǵamdyq tyńdaýlarda kóterilgen máseleler boıynsha túpkilikti sheshimdi qorshaǵan ortany qorǵaý salasyndaǵy ýákiletti organ qabyldaıdy.
«Hattamany ratıfıkasııalaý teris áleýmettik-ekonomıkalyq, quqyqtyq, ekologııalyq saldarǵa ákep soqtyrmaıdy. Respýblıkalyq bıýdjetten qosymsha qarjylyq shyǵyndardy qajet etpeıdi», dedi vedomstvo basshysy.