«Aq jol» demokratııalyq partııasynyń depýtattary Jeltoqsan oqıǵasynyń 35 jyldyǵyn resmı deńgeıde atap ótýdi usyndy, dep habarlaıdy Egemen.kz.
«1986 jyly álemdik alpaýytqa aınalyp turǵan qaharly Keńes ımperııasynan teńdik surap, azattyq úshin alańǵa shyqqan kóteriliske bıyl 35 jyl. Jetpis jyldyq tas buǵaý da jigerin jasyta almaǵan, ulttyq namysyn tunshyqtyra almaǵan qazaq jastary alańǵa shyqqan kún - Táýelsiz el úshin eń qasterli kúnderdiń biri bolýy tıis! Qazaq jastary qylyshynan qan tamǵan keńes ımperııasy kezinde alańǵa nan úshin shyqqan joq, namys úshin shyqty! Pul surap shyqqan joq, Til surap shyqty!», dedi depýtat Qazybek Isa.
Sonymen qatar depýtat Jeltoqsan oqıǵasy qurbandaryna «Halyq Qaharmany» ataǵyn berý máselesin de kóterdi.
«Reseı 1991 jylǵy 19 tamyzda Máskeýde bolǵan GKChP búliginde topalańda tankiniń astyna túsip qalǵan úsh adamǵa «Reseı Batyry» ataǵyn berdi. Bizde nege el táýelsizdigi jolyndaǵy naǵyz kóteriliste mert bolǵan Lázzat Asanova, Erbol Sypataev, Sábıra Muhamedjanovalarǵa «Halyq Qaharmany» ataǵyn bermeske?», dedi depýtat.