Búgin Senat Spıkeri Máýlen Áshimbaevtyń tóraǵalyǵymen Palata otyrysy ótti, dep habarlaıdy Egemen.kz.
Onda depýtattar basqa jumysqa aýysýyna baılanysty Talǵat Jaqannyń ókilettigin toqtatý jáne ony laýazymnan bosatý týraly Respýblıkalyq bıýdjettiń atqarylýyn baqylaý jónindegi esep komıteti Tóraıymynyń usynysyn qarady. Talqylaý nátıjesinde senatorlar Talǵat Jaqannyń ókilettigin toqtatý týraly sheshim qabyldady.
Sonymen qatar Senat otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Armenııa Respýblıkasynyń qosylýyna baılanysty oǵan ózgerister engizý týraly hattamany ratıfıkasııalaý týraly» zań jobasy qaralyp, qabyldandy. Bul qujat EAEO-ǵa múshe memleketterdiń zańnamasyna sáıkes Armenııa, Belarýs, Qazaqstan jáne Reseı Federasııasynyń aýmaǵynda elektr energııasyn memleketaralyq berýdi sharttyq resimdeýge qoıylatyn talaptardy belgileıdi.
«Qazirgi tańda elektr energııasyn tıimdi paıdalaný ekonomıkany damytý úshin mańyzdy. Osy turǵydan kelgende, bul zań Eýrazııalyq ekonomıkalyq odaqqa múshe elderdiń energetıka salasyndaǵy yntymaqtastyǵyn arttyrýǵa oń áserin tıgizedi dep senemiz», dedi Máýlen Áshimbaev.
Sondaı-aq Palata otyrysy kezinde senatorlar ózderiniń depýtattyq saýaldaryn joldady. Depýtat Bekbolat Orynbekov Jambyl oblysyndaǵy tótenshe jaǵdaılar qyzmetiniń shtattyq sanyn kóbeıtý jáne tehnıkalyq jabdyqtalýyn jaqsartý máselesin kóterdi. Senator Dınar Nóketaeva erekshe qajettiligi bar balalardyń máselelesine nazar aýdardy. Al, Aqylbek Kúrishbaev aýyl sharýashylyǵyn odan ári damytý úshin jańa júıeni engizý qajettigin aıtty. Odan bólek, senatorlar ekologııa jáne ekologııalyq baqylaý máselelerin sóz etti. Depýtat Súıindik Aldashev Mańǵystaý oblysyndaǵy «Qoshqar Ata» radıoaktıvti qaldyqtar qoımasyna qatysty problemaǵa alańdaýshylyq bildirse, Andreı Lýkın aýanyń jaı-kúıine ekologııalyq baqylaý júrgizýdi kúsheıtýdi talap etti.