QR Bilim jáne ǵylym mınıstrligi mektepterge baılanysty tapsyrmalardy oryndamaǵan tulǵalarǵa qatysty sharalar qabyldaý úshin birqatar óńirdiń ákimdikterine hat joldady, dep jazady Egemen.kz.
Másele mektep aýlasyndaǵy dárethanalarǵa qatysty suraqtardy sheshý jáne beınebaqylaý kameralarmen, dabyl batyrmalary jáne qaýipsizdik júıeleriniń basqa elementterimen qamtamasyz etý týraly bolyp otyr.
Mektepterdi qarjylandyrý fýnksııalary, olardyń qurylysy jáne qajetti jaǵdaılar jasaý, onyń ishinde sanıtarlyq, qaýipsizdik júıelerimen qamtamasyz etý máseleleri zań júzinde ákimdikterdiń quzyrynda ekenin atap ótken jón.
Oqý jylynyń bastalýy qarsańynda QR BǴM Bilim jáne ǵylym salasynda sapany qamtamasyz etý Komıtetiniń qyzmetkerleri elimizdiń barlyq oblysy men qalalaryndaǵy ákimdikterge vedomstvolyq baǵynyshty mektepterdi tekserdi.
Inspeksııa barysynda Túrkistan, Aqtóbe, Almaty, Shyǵys Qazaqstan, Batys Qazaqstan, Qaraǵandy, Qostanaı oblystaryndaǵy jáne Shymkent qalasyndaǵy mektepterde jyly dárethanalarmen qamtamasyz etý boıynsha kórsetkishtiń 100%-ǵa jetpeıtini anyqtaldy. Buǵan deıin Úkimet oqý jylynyń basynda mektep aýlasyndaǵy barlyq dárethanany joıý mindetin qoıǵan bolatyn.
Sonymen qatar paıdalanylatyn jyly dárethanalardyń epıdemıologııalyq talaptarǵa sáıkestigi boıynsha da suraqtar týyndaıdy. Atap aıtsaq, jabyq kabınalar, qoldy jýý jáne keptirýge arnalǵan qural-jabdyqtardyń bolýy jónindegi jáne taǵy basqa talaptar. Osyndaı máselelerdi sheshý úshin QR BǴM Bilim jáne ǵylym salasyndaǵy sapany qamtamasyz etý komıteti sanıtarlyq erejelerge ózgerister engizdi.
Aıta keteıik, jergilikti atqarýshy organdarmen qysqa merzimde 2600-den astam jyly dárethana salyndy. Sonymen birge Almaty, Shyǵys Qazaqstan jáne Túrkistan oblystarynda beınebaqylaý kameralaryn ornatý boıynsha máseleler tolyq sheshilmegen.