QR Eńbek jáne halyqty áleýmettik qorǵaý mınıstrligi jáne Qazaqstannyń Eýropalyq bıznes qaýymdastyǵy onlaın-kezdesý ótkizdi, dep jazady Egemen.kz.
Sharaǵa QR Eńbek jáne halyqty áleýmettik qorǵaý mınıstri Serik Shápkenov, birinshi vıse-mınıstr Aqmádı Sarbasov, QEBQ Dırektorlar keńesiniń tóraǵasy Erlan Dosymbekov, atqarýshy dırektory Iýlııa Kýsaıdı jáne qaýymdastyqtyń basqa da músheleri qatysty.
Onlaın-kezdesý barysynda eńbek jáne kóshi-qon zańnamasynyń ózekti máseleleri, atap aıtqanda, personaldy usyný, qyzmetkerlerdi issaparǵa jiberý, qashyqtan jumys isteý, sheteldik jumys kúshin tartý, jumyspen qamtýdyń jańa nysandary jáne t.b. máseleler talqylandy.
Aqmádı Sarbasov baıandama jasady. Spıker eńbek qatynastaryn zańnamalyq deńgeıde retteý jáne Qazaqstan jaǵdaıynda sheteldik jumys kúshin tartý erekshelikteri týraly aıtyp berdi.
«Onlaın-kezdesýdiń sońynda Serik Shápkenov pen Erlan Dosymbekov Yntymaqtastyq týraly memorandýmǵa qol qoıdy. Qujat sheńberinde taraptar ınvestısııalyq tartymdylyqtyń ósýi, eńbek jáne kóshi-qon zańnamasyn jetildirý, Qazaqstan men Eýropalyq Odaq elderi arasyndaǵy áleýmettik bastamalardy iske asyrý úshin birlesken kúsh-jiger jumsaıtyn bolady», dep jazady Eńbekmıniniń baspasóz qyzmeti.