Dúnıejúzilik densaýlyq saqtaý uıymy Reseıdiń "Spýtnık V" vaksınasyn qaraý prosedýrasyn toqtatty. Bul týraly brıfıngte DDSU janyndaǵy Panamerıkalyq densaýlyq saqtaý uıymy dırektorynyń orynbasary Iаrbas Barbosa málimdedi, dep habarlaıdy Egemen.kz.
Onyń aıtýynsha, qazirgi ýaqytta preparatty maquldaý týraly ótinish toqtatylǵan. Bul eýropalyq retteýshiniń ókilderi ınspeksııa barysynda Reseıdegi zaýyttardyń birinde birqatar óndiristik buzýshylyqty anyqtaǵannan keıin oryn aldy.
«Sputnik V-di tótenshe jaǵdaılarda (EUL) paıdalaný úshin tizimge engizý prosesi toqtatyldy, óıtkeni vaksına jasalatyn zaýyttardyń birin tekserý kezinde onyń tıisti óndiristik tájirıbege sáıkes kelmeıtini anyqtaldy», dep túsindirdi Iаrbas Barbosa.
Bul jerde farmkompanııalarǵa qoıylatyn qoldanystaǵy normatıvtik talaptar – Good Manufacturing Practices (GMP) aıtylǵan. Farmasevtıkalyq ónimderdi jasaýmen aınalysatyn kásiporyndar tıisti óndiristik praktıka standarttaryn ustanýǵa mindetti.Dırektordyń orynbasary sonymen qatar bul prosedýra reseılik tarap barlyq belgilengen kemshilikterdi tolyǵymen joıǵannan keıin ǵana jalǵasatynyn aıtty. Budan keıin DDSU ókilderi taǵy bir tekseredi.