Vedomstvonyń málimetinshe, oqıǵa 16 qyrkúıek kúni saǵat 17:00-de bolǵan, dep habarlaıdy Egemen.kz.
О́rt qalanyń shetindegi telemunara tusynan bastalyp, «Vavılov» saıajaı alabyna taraǵan.
Tilsiz jaý 20 gektar aýmaqtaǵy qurǵaq shópti sharpydy. Odan 3,5 gektar aýmaqtaǵy 58 saıajaı ýchaskesine taraldy, onyń úsheýinde saıajaı úıleri zardap shekti.
«О́rtti aýyzdyqtaýǵa TJD jeke quramynan 34 adam men tórt arnaıy órt sóndirý tehnıkasy, «OPAZ» memlekettik emes órt qaýipsizdigi qyzmetiniń 4 jumysshysy men 1 tehnıkasy, «EPK» AQ órt qaýipisizdigi bóliminiń 4 qyzmetkeri men 1 tehnıkasy, «Qazaqaltyn» kásipornynyń 4 qyzmetkeri men 1 tehnıkasy, «Manı» JShS-nyń 2 qyzmetkeri men 2 tehnıkasy, Stepnogor qalalyq sý kanalynyń 2 qyzmetkeri men 2 tehnıkasy jumyldyryldy», dedi vedomstvodan.
TJD baspasóz qyzmetinen atap ótkendeı, oqys oqıǵadan eshkim zardap shekpegen. О́rt saǵat 20:45 aýyzdyqtalyp, 22:00-de tolyq sóndirildi. Qazirgi kezde, órttiń shyǵý sebebi men saldary anyqtalyp jatyr.