Nur-Sultan qalasynyń ákimi Altaı Kólginov Instagram paraqshasynda eldi mekenderdi, sondaı-aq jylý elektr ortalyqtaryn gazdandyrý barysy týraly aıtty, dep habarlaıdy Egemen.kz.
«О́zderińiz biletindeı, elordany «Nur-Sultan – jaıly qala» master-jospary aıasynda damytyp jatyrmyz. Turǵyn úı jaǵdaıy — jaıly ómir súrýdiń mańyzdy bólikteriniń biri. Qalada ómir súrý sapasyn arttyrý úshin gazdandyrý jumysy júrip jatyr: ótken jylytý maýsymynan bastap birqatar eldi meken gazǵa kezeń-kezeńimen qosyla bastady.
Agroqalashyq eldi mekeni turǵyndarymen kezdesip, aýmaqty damytý máselelerin talqyladyq, sonyń ishinde gazdandyrý barysy da talqylandy. Qalany tolyq gazdandyrý 2023 jyly aıaqtalady. «Kóktal-1», «Kóktal-2», «Temirjolshylar», «Agroqalashyq» eldi mekenderiniń turǵyndary gazǵa qosyldy.
Bıyl kúzde Ońtústik-Shyǵys, Promyshlennyı, Agroqalashyq (qosylmaǵan bóligi) eldi mekenderiniń turǵyndary gazǵa qosyla alady. Sondaı-aq «QazTransGaz Aımaq» AQ Kúıgenjar, Mıchýrıno, Internasıonalnyı eldi mekenderinde gazben jabdyqtaý jelileriniń qurylysyn júrgizýde. Atalǵan eldi mekenderdi jyl sońyna deıin gazben qamtamasyz etý josparlanyp otyr. «Qazaqaýyl» (Qaraótkel) shaǵyn aýdany boıynsha jobalaý-smetalyq qujattama ázirlenýde.
Osylaısha, júıeli negizde gaz taratý jelilerin salý boıynsha aýqymdy jumystar jalǵasyp jatyr. Nebári eki jyldyń ózinde elordada 645 km ishki kvartaldyq gazben jabdyqtaý jelileri salyndy. Jyl sońyna deıin taǵy 17 km gaz taratý jelisin salynady.
«Gazdandyrý – Elbasynyń aýqymdy jobasy. Joba qala turǵyndarynyń ómir súrý sapasyn arttyryp, qala ekologııasyn aıtarlyqtaı jaqsartýǵa múmkindik beredi. Osy baǵytta jylý elektr ortalyqtaryn jańǵyrtý jumystaryn júrgizip jatyrmyz: osy jyldyń sońyna deıin qalǵan sý jylytý qazandyqtaryn gazǵa aýystyramyz, JEO-3 boıynsha jobaǵa túzetý júrgizildi, qurylys-montajdaý jumystary, onyń ishinde sý jylytý qazandyǵy da qalpyna keltirildi. Eger JEO-3 6,5 mln sharshy metr turǵyn úıdi, onyń ishinde áleýmettik nysandardy, ákimshilik ǵımarattardy jylýmen qamtýǵa múmkindik berse, onda sý jylytý qazandyqtarynyń qýaty JEO-3 qýatynan 2 ese asady. Qazandyqtar birinshi kezekte tapshylyq boljanatyn ýchaskelerdi jylýmen qamtamasyz etedi. Bul máseleler Memleket basshysynyń baqylaýynda», dep jazdy elorda ákimi.