17 qyrkúıek QR Premer-Mınıstri elimizdiń eń iri ulttyq parkteriniń biri – «Altyn-Emel» memlekettik ulttyq tabıǵı parkinde saparmen boldy. Sapar aıasynda «QazaqGeography» respýblıkalyq qoǵamdyq birlestiginiń Basqarma tóraǵasy Orman Nurbaev pen joba jetekshisi Jánibek Álkeev Premer-Mınıstrge Sharyn shatqalynda shaǵyn sáýlet nysandaryn ornatý boıynsha jumys nátıjelerin usyndy, sondaı-aq osy eki ulttyq parktegi ınfraqurylymdy damytý tujyrymdamasymen tanystyrdy, dep jazady Egemen.kz.
Osylaısha «Sharyn» saıabaǵynda sýsyz jumys isteıtin eko-ájethanalar, demalýǵa arnalǵan jappalar, grotalar (arnaıy kóleńkeli shatyrlar), kelgen týrısterge arnalǵan aýyz sý burqaqtary, sondaı-aq sholý alańdary paıda boldy. Dál osyndaı jaǵdaı «Altyn-Emel» saıabaǵynyń aýmaǵynda da jasalatyn bolady, al ázirshe munda janýarlardy baqylaýǵa arnalǵan baıqaý munarasy ornatylǵan, ýaqyt óte kele taǵy birneshe munara ornatý josparlanyp otyr.
Budan bólek, «Sharyn» týrıstik marshrýtynyń bir bóligi bolyp tabylatyn «Saraılar alqabynda» endi týrısterdi baǵdarlaý úshin navıgasııa jumys jasaıdy.
Dál sol «Saraılar alqabynda», «QazaqGeography» uıaly operatormen seriktestikte uıaly baılanys antennalaryn ornatty. Ekotýrızmdi damytý jáne «jasyl» tehnologııalardy paıdalaný, qorshaǵan ortany saqtaý boıynsha «QazaqGeography» mindetterin eskere otyryp, antennalardy elektr qýatymen qamtamasyz etý kún batareıalary jáne jel generatorlarynyń kómegimen júrgiziletinin atap ótken jón: óndirilgen elektr qýaty arnaıy akkýmýlıatorlarda jınaqtalady jáne stansııany táýlik boıy energııamen qamtamasyz etýge múmkindik beredi.
«Birtindep, biz basty maqsatymyz – ulttyq tabıǵı saıabaqtardy barynsha sapaly ári yńǵaıly ınfraqurylymmen qamtamasyz etýge, tabıǵatymyzdyń biregeıligin, tutastyǵy men tazalyǵyn saqtaı otyryp, týrıster úshin tartymdy etýge senimmen qadam basyp kelemiz. «QazaqGeography» qoǵamnyń tabıǵatqa degen qatynasyn jaqsy jaqqa ózgertýge, búkil halyqtyń ulttyq qazynasy men ata-babalarymyzdyń murasyna degen qamqorlyǵyn tárbıeleýge jáne darytýǵa nıetti. Sondaı-aq, bizdiń bas seriktesimiz Kaspi.kz kompanııasy ekenin atap ótkim keledi, sonyń arqasynda biz bul jobalardy memleket qarjysyn paıdalanbaı júzege asyryp jatyrmyz», dedi «QazaqGeography» Basqarma tóraǵasy Orman Nurbaev.
Premer-Mınıstr óz kezeginde qoǵamdyq birlestiktiń jumysyn joǵary baǵalap, ulttyq saıabaqtardy odan ári damytý jóninde birqatar tapsyrmalar berdi.
«QazaqGeography» QB bas seriktesi Kaspi.kz ekenin atap ótkimiz keledi.