Astanada bolashaq olımpıadashylardy daıarlaıtyn taǵy bir meken - «Jas batyr» sporttyq-saýyqtyrý kesheni paıdalanýǵa berildi. Búgin Q.Munaıtpasuly atyndaǵy Olımpıada rezervi respýblıkalyq mektep ınternat-kolledjine qarasty osy ordanyń ashylý saltanaty ótti. Bul týraly egemen.kz tilshisi habarlady.
Rásimge Sport jáne dene shynyqtyrý isteri agenttiginiń tóraǵasy Tastanbek Esentaev, «Qajymuqan Munaıtpasuly atyndaǵy Olımpıada rezerviniń respýblıkalyq mamandandyrylǵan mektep ınternat-kolledji» RMM dırektory Serik Tókıev, Olımpıada chempıony, «Astana» prezıdenttik sport klýbynyń prezıdenti Baqtııar Artaev, Olımpıadanyń kúmis jáne qola júldegerleri Georgıı Sýrsýmııa men Arman Shilmanov qatysty.
Rásimde agenttik tóraǵasy sport keshenin aralap, jańa paıdalanýǵa berilgen sport nysanynyń qurylysyna joǵary baǵa berdi. Onda ataqty balýan Qajymuqan atyndaǵy sport ordasynyń oqytýshylar quramy men oqýshylarynyń aldynda sóz sóılep, talaı dańqty sportshylarymyzdy túlep ushyrǵan mekteptiń qabyrǵasynan aldaǵy ýaqytta da elimizdiń namysyn qoldan bermeıtine, kók baıraǵymyzdy bıikke kóteretin sańlaqtarymyzdyń shyǵatynyna senim bildirdi. Al oqý orny oqýshylarynyń atynan Qazaqstan chempıony, III Jastar oıyndarynyń jeńimpazy Madııar Januzaq sóz alyp, sport kesheni úshin rızashylyǵyn jetkizdi.
Keshenniń qurylysy 2011 jyly bastalǵan. Munda bir kúnde 300 adam jattyǵa alady. Ár aınalymda on adam orynnan sekirip, segiz adam ıadro laqtyratyndaı múmkindik te jasalǵan.
Dastan Kenjalın.
Derekkóz: «Jas batyr» sporttyq-saýyqtyrý kesheni.
Foto: Maqsut Irjanov.