Bıyl segiz aı ishinde 53 adamdy poıyz qaǵyp, 28 adam mert bolǵan, dep habarlaıdy Egemen.kz QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.
Mundaı qaıǵyly jaǵdaılarǵa kóbine zardap shekkenderdiń ózderi kináli bolyp jatady. Biri qulaqqappen mýzyka tyńdap kele jatyp baıqamaı qalsa, biri masań kúıde, endi biri ózine qol jumsamaq bolady. Taqap qalǵan poıyzdyń aldynan ótip úlgeremin deıtinder de bar.
«Kúz bastalysymen «Qazaqstan temir joly» AQ aldyn alý is-sharalaryn kúsheıtti. Temirjol stansııalarynda, joldy jappaı ruqsatsyz kesip ótý oryndarynda kólik polısııasy jelilik bólimshesi qyzmetkerleriniń qatysýymen reıdter ótkiziledi. Temirjolshylar temirjolǵa jaqyn ornalasqan aýdan turǵyndaryna qaýipsizdik erejelerin saqtaý qajettiligi týraly túsindirý jumystaryn júrgizýde», dep jazylǵan habarlamada.