Búgin Senat Tóraǵasy Máýlen Áshimbaevtyń qatysýymen Palata janyndaǵy Jas sarapshylar klýbynyń kezekti otyrysy ótti, dep habarlaıdy Egemen.kz.
Altynshy ret uıymdastyrylyp otyrǵan otyrysta qatysýshylar azamattyq qoǵamnyń damý úrdisi men elimizdegi medıa salasynyń bolashaǵy týraly sóz qozǵady.
Kezdesýge Qazaqstannyń Aqparat jáne qoǵamdyq damý mınıstri Aıda Balaeva, Klýb músheleri jáne arnaıy shaqyrylǵan sarapshylar qatysty.
Otyrysty ashqan Máýlen Áshimbaev Memleket Basshysy Qasym-Jomart Toqaevtyń azamattyq jáne saıası saladaǵy negizgi bastamasy «Halyq únine qulaq asatyn memleket» tujyrymdamasy aıasynda bılik pen qoǵamnyń turaqty dıalogyn jolǵa qoıýǵa jáne memleketti basqarýǵa azamattyq qoǵamnyń qatysýyn arttyrýǵa arnalǵan júıeli reformalar qolǵa alynǵanyna nazar aýdardy.
Senat Spıkeri qazirgi tańda elimizde qoǵamdyq-saıası salada kezeń-kezeńimen júrgizilip jatqan reformalar jalǵasyp otyrǵanyn aıtty.
«Memleket basshysynyń bıylǵy Joldaýynda mańyzdy mindetter belgilendi. Birinshiden, aýyldyq jerlerde azamattyq bastamalardy qoldaýdyń tıimdi tetigin ázirleý mindeti qoıyldy. Ekinshiden, Memleket basshysy depýtat mandatyn bólý kezinde áıelder men jastar úshin 30 paıyzdyq kvotany mindetti túrde eskerý týraly normany zańmen bekitýdi tapsyrdy. Úshinshiden, erekshe qajettiligi bar azamattarǵa da kvota belgileý kerektigi aıtyldy. Mundaı qadamdar halyqtyń ártúrli toptarynyń azamattyq quqyqtaryn eskeretin ınklıýzıvti qoǵam qurýǵa yqpal eteri sózsiz», dedi Senat Tóraǵasy.
Klýb otyrysynda talqylanǵan mańyzdy máselelerdiń biri medıa salasyna qatysty boldy. Máýlen Áshimbaev pandemııa kezeńinde medıakommýnıkasııanyń erekshe ról atqarǵanyn nazarǵa aldy.
«Pandemııa kezeńinde naqty málimetter men tekserilgen aqparattardyń tapshylyǵy baıqaldy. Sondyqtan adamdar aqparat kózderine muqııat mán berip, bedeldi medıalarǵa ǵana basymdyq berdi. Budan sapaly jańalyqtar taratatyn jýrnalıstıka paıda kórdi. Nátıjesinde, álemniń jetekshi quraldarynyń oqyrmandary kóbeıip qana qoımaı, olardyń aqyly aqparat qory da arta túsken», dedi Palata Tóraǵasy.
Sonymen qatar Máýlen Áshimbaevtyń aıtýynsha, resmı aqparat kózderine degen senimsizdik feık-nıýsderdiń jáne ártúrli konspırologııalyq teorııalardyń kóbeıýine ákelip soqtyrǵan.
«Qazirgideı aqparattar aǵynynda adasyp qalmaý úshin adamǵa aq pen qarany ajyratatyn arnaıy bilim kerek. Bul rette jańa zaman adamy úshin medıasaýattylyqtyń mańyzy zor ekeni sózsiz. Menińshe, osy trendti eskerip, Qazaqstanda álemge ǵylymı kózqaras qalyptastyratyn salalyq jýrnalıstıkany damytýǵa jáne ǵylymdy dáripteıtin qoǵamdyq pikirdiń kóshbasshylaryn daıyndaýǵa kóńil bólgen jón. Bul medıa salasynyń sapasyn arttyrýǵa múmkindik beredi», dep qorytyndylady Máýlen Áshimbaev.