Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Astanaǵa resmı saparmen kelgen Nıderland Koroldiginiń Syrtqy ister mınıstri Frans Tımmermanspen kezdesti, dep habarlady Senattyń baspasóz qyzmeti.
Júzdesýshiler ekijaqty qatynastardyń ártúrli máseleleri jáne álemdegi jaǵdaılar týraly pikir almasty. Senat Tóraǵasy atap ótkendeı, Nıderland Qazaqstannyń Eýropalyq Odaqtaǵy negizgi áriptesteriniń biri bolyp tabylady. Prezıdent N.Nazarbaevtyń jyl saıynǵy halyqqa Joldaýyndaǵy mindetter aıasynda ekijaqty yntymaqtastyqtyń ekonomıkalyq jáne ǵylymı-tehnıkalyq máseleleri jańa mazmunǵa ıe bolyp keledi.
О́z kezeginde F.Tımmermans Qazaqstannyń álemdegi damyǵan 30 eldiń qataryna kirý strategııasyna joǵary baǵa berdi. Nıderland aýyl sharýashylyǵy jáne balama energetıka salalarynda tájirıbe almasý arqyly bul jobaǵa qatysýǵa nıetin bildirdi. Bıylǵy jylǵy naýryz aıynda Gaagadaǵy Iаdrolyq qaýipsizdik jónindegi sammıt qarsańynda Nıderland SIM basshysy ıadrolyq qarýsyzdaný máselelerindegi Qazaqstan kóshbasshylyǵynyń máni zor ekenin atap ótti.
Kezdesý barysynda Q.Toqaev Qazaqstan men Nıderland parlamentaralyq baılanystary týraly óz oılarymen bólisti. Atap aıtqanda, Qazaqstanda golland depýtattarynyń, onyń ishinde Nıderland Senaty Tóraǵasynyń ózekti máseleler boıynsha pikir almasý úshin Astanaǵa sapary ekijaqty yntymaqtastyqqa serpin beredi dep sanaıdy. Odan basqa, Qazaqstan Parlamentiniń depýtattary EQYU Parlamenttik Assambleıasy aıasynda kóptarapty baılanystardy damytýǵa da nıettenip otyr.