Mashına jasaý salasyn damýtydyń 2019-2024 jyldarǵa arnalǵan baǵdarlamasyna ózgerister engizilip jatyr, dep habarlaıdy Egemen.kz.
Bul týraly QR Indýstrııa jáne ınfraqurylymdyq damý vıse-mınıstri Marat Qarabaev Qazaqstan mashına jasaýshylarynyń IH forýmynda aıtty.
«Elimizdiń sapaly damýy óńdeýshi ónerkásiptiń neǵurlym tıimdi jáne básekege qabiletti baǵyttaryna ónerkásiptik saıasatty shoǵyrlandyrýǵa negizdelýi tıis. Álemdik tájirıbede mashına jasaý «tehnologııasy kúrdeli» salalardyń qataryna kiredi. Sondyqtan biz, neǵurlym kúrdeli jáne tıisinshe qosymsha quny joǵary taýarlardy óndirýge tıispiz. Mashına jasaý óniminiń otandyq óndirisin qoldaý úshin mınıstrlik Qazaqstannyń mashına jasaýshylar Odaǵymen birlesip, mashına jasaýdy damytýdyń 2019-2024 jyldarǵa arnalǵan Jol kartasyn ázirledi, bekitti jáne iske asyrýda», dedi vıse-mınıstri forýmnyń plenarlyq otyrysynda.
Onyń sózine qaraǵanda, jol kartasy salyq preferensııalaryn engizý, ınstıtýsıonaldyq ortany jetildirý, otandyq kásiporyndardy shıkizatpen qamtamasyz etý, satyp alýdaǵy jergilikti qamtý úlesin arttyrý, tehnıkalyq retteý sharalaryn jetildirý, ekonomıkalyq yntalandyrý tetikterin engizý bóliginde is-sharalardy kózdeıdi.
«Qazirgi ýaqytta mashına jasaýdy damytý jónindegi 2019-2024 jyldarǵa arnalǵan Jol kartasyn ózektendirý júrgizilýde, onda otandyq taýar óndirýshilerdi qoldaý men yntalandyrýdyń qosymsha tetikteri boıynsha usynystar ázirlendi.
Osylaısha, otandyq taýar óndirýshilerdi qoldaý maqsatynda mınıstrlik kásipkerlikti yntalandyrý týraly erikti kelisim jasasý boıynsha shara usyndy. Kelisimge jer qoınaýyn paıdalaný salasyndaǵy ýákiletti organ men jer qoınaýyn paıdalanýshylar arasynda qol qoıylady jáne halyqaralyq mindettemelerge qaıshy kelmeıdi.
Búgingi tańda qatty paıdaly qazbalardy óndirý boıynsha 37 jer qoınaýyn paıdalanýshymen 46 kelisimge jáne kómirsýtek shıkizaty boıynsha 65 jer qoınaýyn paıdalanýshylmen 112 kelisimge qol qoıyldy», dedi Marat Qarabaev.