Memleket basshysy Qasym-Jomart Toqaev Eýropalyq qaıta qurý jáne damý bankiniń prezıdenti Odıl Reno-Bassomen kezdesti, dep habarlaıdy Egemen.kz.
Kezdesý barysynda Eýropalyq qaıta qurý jáne damý bankiniń Qazaqstanda atqarǵan jumystarynyń nátıjeleri men yntymaqtastyqty odan ári nyǵaıtýdyń basymdyqtary talqylandy.
Qasym-Jomart Toqaev Odıl Reno-Bassoǵa iltıpat bildirip, aqpan aıynda onlaın rejımde ótkizgen kezdesýde ózara jemisti áńgime órbitkenin, alaıda onyń Qazaqstan men EQDB arasyndaǵy yntymaqtastyq máseleleri jóninde oı-pikir almasýǵa múmkindik beretin betpe-bet júzdesýdeı bolmaıtynyn atap ótti.
«Eýropalyq qaıta qurý jáne damý banki – Qazaqstannyń strategııalyq seriktesi. Yntymaqtastyq ornatqan ýaqyttan beri sizdiń bank bizdiń ekonomıkamyzǵa 8 mıllıard evrodan astam ınvestısııa salyp, 300-ge jýyq joba júzege asyryldy. Jalpy banktiń ártúrli salalardy, ásirese jańartylatyn qýat kózderi sektoryn belsendi qarjylandyrǵanyn bilemiz. Jańartylatyn qýat kózderi salasyndaǵy yntymaqtastyqty jalǵastyramyz dep senemiz, sondaı-aq agroónerkásip kesheni baǵytyndaǵy jobalardy da júzege asyrý asa mańyzdy», dedi Memleket basshysy.
Sonymen qatar kezdesýde koronavırýs pandemııasy, qarjy jáne taýar naryqtaryndaǵy turaqsyzdyq sııaqty problemalardy qamtıtyn álemdik ekonomıkanyń damýyna qatysty aýqymdy máseleler qarastyryldy.
EQDB prezıdenti Odıl Reno-Basso álemdik ekonomıkanyń damýy men Qazaqstandaǵy ekonomıkalyq ósim týraly óz boljamymen bólisti.