Qaraǵandyda jolaýshylar avtobýsynyń júrgizýshisi men kassıri bılet pulyna jetpegen 30 teńgesine bola alty jasar balany anasymen birge aıazdy kúni aıdalaǵa tastap ketken. Muny «31 telearna» habarlady.
«Qaraǵandyda tólemge jetpeı qalǵan 30 teńge alty jasar balanyń densaýlyǵyna zalal keltirdi. Marshrýtty avtobýstyń júrgizýshisi jol aqysyna jetpeı qalǵan osynsha teńgesi úshin jolaýshy áıeldi balasymen birge qalanyń bir shetine aparyp, tastap ketken», – delingen habarlamada.
Anyqtalǵandaı, Tatıana Zaharova sol kúni tańerteń kenje ulyn mektepke apara jatady. Olarǵa bar-joǵy úsh aıaldama júrý kerek bolǵan. Kelinshek avtobýsqa mingen kezinde ǵana qaltasyndaǵy aqshasynyń jetimsiz ekenin baıqaıdy. Sondyqtan kassırge 80 teńge ornyna janynda bar 50 teńgesin beredi. Al kassır buǵan jaýap retinde olardy óz aıaldamalarynan túsirmeı, qalanyń bir shetine aparyp tastap ketedi.
Alaıda, aıdalada qalǵan Zaharovanyń balasyn alyp, úıine qaıtýǵa aqshasy bolmaıdy. Sebebi, sońǵy 50 tıynyn jańaǵy kassır qaǵyp alǵan. Onymen qoımaı, qasaqana qalanyń bir shetine deıin jetkizip, túsirip ketkeni taǵy bar. Bul ne degen kesepattyq deseńizshi!
Sosyn ana men bala aıazdy kúni aıdalada biraz turyp qalady. Eger sol kezde polıseı patrýliniń mashınasy kezigip, ala ketpegende, bulardyń jaǵdaıy tipti múshkil bolar edi. Sonyń ózinde kishkentaı bala sýyqqa ábden urynyp qalǵan eken.
«Qarasaq, aıazdan azap shekken balaqaı jylap tur. Kózinen aqqan jasy sol mańda qatyp qalypty. Osyndaı borandy kúni balaly áıeldi dalaǵa tastap ketip júrgen qandaı tasjúrekter edi! Meni olardyń osynshalyqty qatygezdikteri qatty qaıran qaldyrdy», – deıdi jol-patrýl qyzmetiniń polıseıi Aleksandr Sádýaqasov.
Nátıjesinde birinshi synyptyń oqýshysy qalpaqtaı túsedi. Ol dene qyzýymen shuǵyl aýrýhanaǵa jatqyzylady. Dárigerler alty jasar uldyń aýyryp qalýy denesiniń tońazyǵanynan bolǵanyn aıtyp otyr.
Tatıana Zaharova qazir júrgizýshiniń ústinen qalalyq kommýnaldyq sharýashylyq jáne kólik bólimine shaǵym berip qoıypty. Eger odan nátıje bolmasa, budan ári sot pen prokýratýraǵa shaǵymdanbaqshy.
Qurysh NURYMBET.