Búgin Senat 7 jastan 18 jasqa deıingi balalardy múgedektik toptary boıynsha bóletin zańdy qabyldady. Bul týraly joǵarǵy palatanyń otyrysynda málim boldy, dep jazady Egemen.kz.
Múgedek balalarǵa arnalǵan járdemaqy kólemi artady. Salystyrý úshin, qazirgi ýaqytqa deıin barlyq múmkindigi shekteýli balalar eń tómengi kúnkóris deńgeıiniń 1,4 mólsherinde birdeı járdemaqy alatyn. Bul - 48 023 teńge. Endi I jáne II toptaǵy 7 jastan 18 jasqa deıingi múgedek balalar tıisinshe 64 860 teńge jáne 54 541 teńge alatyn bolady.
Budan basqa, az qamtylǵan otbasylardan shyqqan balalarǵa áleýmettik paket usyný jáne áleýmettik qyzmetter portaly arqyly arnaýly áleýmettik qyzmetter kórsetýge kepildik beriledi.
«Qabyldanǵan Zań múmkindigi shekteýli azamattardyń, onyń ishinde balalardyń jaǵdaıyn jaqsartýǵa, áleýmettik teńsizdikterdi joıýǵa, qoldanystaǵy áleýmettik qamsyzdandyrý júıesin odan ári jetildirýge arnalǵan. Aldaǵy ýaqytta osy zań múmkindikteri shekteýli azamattarymyzdyń jáne múgedek balalary bar otbasylardyń quqyqtaryn qamtamasyz etýge, olardyń ómir súrý sapasyn jaqsartýǵa oń áserin tıgizedi dep senemiz», dep atap ótti Senat tóraǵasy Máýlen Áshimbaev.
Turǵyn úı qatynastary salasyna da ózgerister engizildi. Endi múgedek bala tárbıelep otyrǵan otbasylar úshin jáne olar 18 jasqa tolǵannan keıin turǵyn úı alýǵa kezek saqtalatyn bolady.