Bıyl alty aıda el azamattarynyń alǵan nesıesi 8,6 trln teńgege jetken. Bul 2020 jyldyń jarty jylymen salystyrǵanda 26 paıyzǵa kóp. Halyqtyń tutynýshylyq nesıeleri 5 trln teńgeni qurapty. Bul da 19,4 paıyzǵa ósken.
Ranking agenttiginiń jazýynsha, jeke tulǵalar zaımdarynyń ortasha kólemi bir jumysshyǵa 2,28 myń dollardan keledi. Bul rette nesıeniń barlyq túri (ıpoteka da) eseptelgen. Tikeleı tutynýshylyq nesıeler kólemi jumys isteıtin bir qazaqstandyqqa 1,32 myń dollardan tıesili. Bul kórsetkish boıynsha Qazaqstan ózge elderden artta qalǵan. Trading Economics sarapshylarynyń dereginshe, álemniń 45 iri ekonomıkasy arasynda Qazaqstan jumyspen qamtylǵan bir azamatqa qaryzdyq qarjylandyrý kólemi boıynsha 41-orynda.
Trading Economics reıtıngindegi elderdiń basym kópshiliginiń tek tutynýshylyq nesıeleri ǵana eskerilgen. Biraq Qazaqstan men Reseı, taǵy da azdaǵan elder boıynsha barlyq zaım kólemi, onyń ishinde ıpoteka jáne bólshek nesıe qarastyrylǵan. Sonyń ózinde Qazaqstan nesıe naryǵy asa qýatty sanalatyn Shveısarııa (202,3 myń dollar), Aýstralııa (170,3 myń dollar), Norvegııa (160,2 myń dollar), Fransııa (65,9 myń dollar) elderindegi adam basyna shaqqandaǵy nesıeleý deńgeıine jete almaıdy. Qytaı (10,1 myń dollar), Reseı (4,1 myń dollar) jáne Armenııadaǵy (2,3 myń dollar) deńgeıge jetý de birshama qıyn sekildi.
«Jan basyna shaqqandaǵy nesıe kólemi joǵary bolý úshin ol adamnyń qaryzdy tóleı alatyn qabileti joǵary bolýy tıis. Bul birinshi kezekte nesıeniń ortasha jalaqyǵa qatynasyna baılanysty. Osy kórsetkish boıynsha da Qazaqstan kóp elden tómen tur. Jeke tulǵalardyń barlyq nesıelerin esepke alǵannyń ózinde Qazaqstan 29-orynda. Bul jaǵdaıda bir jumyspen qamtylǵan azamatqa shaqqandaǵy bólshek nesıelerdiń ortasha kólemi 4 ortasha jalaqymen jabylady. Eger tek tutynýshylyq nesıelerdi alar bolsaq, onda bir jumyspen qamtylýshyǵa tıesili ortasha chek nebári 2,3 ortasha jalaqyny quraıdy.