Fýtboldan Qazaqstan chempıonatynyń 22 týr oıyndary óz máresine jetti. Bul kezeńdegi básekeler de ádettegideı óte shıelenisti ótti.
«Shahter» óz alańynda «Qaıratty» qabyldady. Bul oıynda kórermender alǵashqy goldyń kirýin tym uzaq kútti. Tek 76-mınýtta ǵana Idrıs Ýmaev esep ashty. Biraq qaraǵandylyqtardyń qýanyshy uzaqqa sozylmady. Matchtyń aıaqtalýyna bir mınýt qana qalǵanda Rada Dýgalıch tarazy basyn teńseltip ketti – 1:1.
«Aqtóbe» kósh sońynda kele jatqan Taldyqorǵannyń «Jetisýynyń» qaqpasyna jaýapsyz eki dop saldy – 2:0. Bul goldardyń ekeýi de birinshi taımda soǵyldy.
Petropavlovskide ótken «Qyzyljar» men «Turan» arasyndaǵy básekeniń taǵdyryn qonaqtardyń 76-mınýtta soqqan jalǵyz doby sheshti – 0:1.
«Astana» Nur-Sultanda «Tarazdyń» tas-talqanyn shyǵardy – 3:0. Bir keremeti, dýbl avtory atanǵan Tıgran Barsegıan óz goldaryn 1 jáne 7-mınýtta soqsa, 21-mınýtta Marın Tomasov mergendik tanytty.
Osy týrdaǵy ózge kezdesýlerdiń nátıjeleri mynadaı: «Aqjaıyq» – «Qaısar» 1:1, «Atyraý» – «Tobyl» 0:1 jáne «Ordabasy» –«Kaspıı» 1:1.
Jarys kestesinde «Astana» áli de kósh bastap keledi. Elordalyq klýb 50 upaıdy enishilep otyr. Ekinshi oryndaǵy «Tobyldyń» basty qarsylasynan bir upaıy kem. Qorjynynda 41 upaıy bar «Qaırat» úshinshi satyǵa jaıǵasty.