Sybaılas jemqorlyqqa qarsy qyzmet túrli alańdarda aldaǵy bes jylǵa arnalǵan sybaılas jemqorlyqqa qarsy kúres jónindegi is-qımyl baǵdarlamasyn aıqyndaıtyn strategııalyq qujat jobasyn talqylaýdy jalǵastyrýda, dep jazady Egemen.kz.
Tıisti tapsyrmany Prezıdent óziniń Qazaqstan halqyna Joldaýynda bergeni belgili.
Bul joly Agenttik alańynda belgili qazaqstandyq ekonomıster jınaldy. Olardyń ishinde, kásipkerlerdiń quqyqtaryn qorǵaý jónindegi ýákil R.Júrsinov, «TALAP» ortalyǵynyń dırektory R.Oshaqbaev, «Atameken» UKP atqarýshy dırektory A.Qysyqov, zertteý jáne konsaltıng ortalyǵynyń dırektory Q.Qojymov jáne «Dasco Consulting Group» basqarýshy seriktesi D.Sádýaqasov bar.
Jıyndy ashqan Sybaılas jemqorlyqqa qarsy is-qımyl agenttigi tóraǵasynyń birinshi orynbasary O.Bektenov atalǵan qujattyń qoǵamnyń barlyq salasyna qatysty bolatynyn atap ótti. Onyń aıtýynsha, Agenttik barlyq áleýmettik toptardyń ókilderimen jańa qujatty jan-jaqty talqylaýǵa múddeli.
Talqylaýǵa qatysýshylar salalyq mamandar men sarapshylardyń pikirlerin eskere otyryp, strategııalyq qujatty ázirleý tásilderi boıynsha óz usynystaryn aıtty.