Búgin Qostanaıda bilim berý salasyndaǵy mańyzdy saltanatty is-shara ótti, dep jazady Egemen.kz.
Bul týraly QR Bilim jáne ǵylym mınıstri Ashat Aımaǵambetov Facebook-tegi paraqshasynda jazdy.
Muǵalimderdiń kásibı merekesi qarsańynda «Úzdik pedagog – 2021» respýblıkalyq baıqaýynyń qorytyndysy shyǵaryldy.
«Bıyl onynshy ret ótip jatqan mereıtoılyq rásim Qazaqstan Táýelsizdiginiń 30 jyldyǵy qarsańynda uıymdastyrylyp, asa kórnekti aǵartýshy, pedagog Ybyraı Altynsarınniń 180 jyldyǵymen tuspa-tus keldi. Osyǵan baılanysty biz is-sharany uly aǵartýshynyń týǵan jerinde ótkizemiz dep sheshim qabyldadyq», dedi ol.
Prezıdenttiń qoldaýynyń arqasynda jáne jańa zańnyń qabyldanýynyń nátıjesinde muǵalimderdiń jalaqysy artyp, pedagogterdi ózine tán emes fýnksııalardan bosatý boıynsha jumys júrgizilik keledi.
«Búgin elimizdiń túkpir-túkpirinen kelgen 64 muǵalim «Úzdik pedagog-2021» ataǵyna ıe boldy. Pedagogterdiń árqaısysy 1000 AEK kóleminde sertıfıkatpen jáne «Úzdik pedagog» tósbelgisimen marapattaldy. Sonymen qatar aqshalaı syıaqylar jergilikti atqarýshy organdar tarapynan da bekitildi. Bul kúni 10 pedagog «Eńbek ardageri» medalimen jáne «Y. Altynsarın», «Bilim berý isiniń qurmetti qyzmetkeri» tósbelgilerimen marapattaldy. Pedagogıka salasynyń eńbek ardagerlerine de qurmet kórsetildi. Barlyq jeńimpazdy laıyqty marapattarymen quttyqtaımyn! Qajyrly eńbekterińiz ben mamandyqqa degen adaldyqtaryńyz úshin alǵys aıtamyn», dep túıindedi BǴM basshysy.