Saýda jáne ıntegrasııa mınıstrligi kovıdten keıingi kezeńde kásipkerlikti damytýdy qoldaý jáne yntalandyrý úshin akkredıtteý qyzmetteriniń qunyn 72 925 teńgeden 51 619 teńgege deıin tómendetý týraly sheshim qabyldady. Bul týraly mınıstr Baqyt Sultanov habarlady, dep jazady Egemen.kz.
«Tómendetilgen tarıf bızneske bosaǵan qarajatty zerthanalyq bazany jańǵyrtýǵa, qyzmetkerlerdi damytýǵa jáne básekege qabilettilikti arttyrýǵa ınvestısııa retinde paıdalanýǵa múmkindik beredi dep úmittenemiz. Men Qazaqstan ónimniń joǵary sapasy men qaýipsizdigin saqtaý kepildiginiń negizi retinde zerthanalyq bazany jetildirýge baǵyt alǵanyn birneshe ret aıtqan bolatynmyn. Bul bizdiń taýarlarymyzdyń álemdik naryqtardaǵy básekege qabilettiligin arttyrý úshin ǵana emes, qazaqstandyqtardy sapaly taýarlarmen qamtamasyz etý úshin qajet», deıdi mınıstr.
Ol eger biz sapaly ishki naryqqa qarap jumys isteıtin bolsaq, onda syrtqy naryqty da ıgere alamyz degendi aıtady.
«Ol kezde zerthanalyq zertteýler nátıjelerin jáne bizdiń sertıfıkattarymyzdy basqa elderdiń tanýyn qamtamasyz etý áldeqaıda ońaı bolady. Eýroodaqqa eksporttaý úshin sharapty sertıfıkattaý jaǵdaıyn mysalǵa alaıyq: qazaqstandyq úsh zerthana eýropalyq standarttar deńgeıinde zertteý sapasynyń kepildigin rastady, endi qazaqstandyq eksporttaýshylar EO-ǵa júzim sharabyna Qazaqstanda sáıkestik sertıfıkattaryn ala alady», deıdi Baqyt Sultanov.
Ol qazirgi ýaqytta «sur» sertıfıkattary bar taýarlar aınalymyn anyqtaý jáne aldyn alý boıynsha adal bıznespen birlesip jumys júrgizip jatyrqandyǵyn aıtty.
«Sonyń ishinde, osyndaı ruqsat berý qujattarymen saýda jasaıtyn akkredıtteý sýbektilerin «qolynan ustap alyp» jatyrmyz. Olar adal kásipkerlerge zııan keltirip qana qoımaı, qazaqstandyqtardyń ómiri men densaýlyǵyna qaýip tóndiredi. Jaqyn arada biz osyndaı alaıaqtyqqa tap bolǵan adamdardyń esimderin jarııalaı bastaımyz dep oılaımyn. El óziniń osyndaı «batyrlaryn» bilýi kerek. Sondyqtan men taǵy da akkredıtteý sýbektilerine: sáıkestikti baǵalaý salasyndaǵy zańnyń barlyq talaptary boıynsha jumys jasańyz jáne naryqta sur sertıfıkattar men sáıkestik deklarasııalarynyń paıda bolýyna jol bermeńiz deımin», dedi mınıstr.