Nesin jasyramyz, «Oralhannyń bir músini ózine uqsamady» dep zamandastarynyń kóńilderi tolmaıtyn. Sátsiz shyqqan eskertkishiniń qatarynda О́skemendegi bıýsti de bar edi. Ol keýde músindegi uqsastyqtyń joqtyǵy óz aldyna, mújilip, tozyp bara jatqan. Muny eskergen qala basshylyǵy jazýshynyń týǵan kúni qarsańynda qoladan quıylǵan eskertkishin tuǵyrǵa qondyrdy.
Eskertkishtiń ashylý saltanatynda oblystyń zııaly qaýymy «mine, músin» desip jatty. Rasymen, tuǵyry bıik músin eńseli eken. Ádettegideı qaqıǵan bıýst emes. Qozǵalys bar. Kúrtesin ıyǵyna ilip, Altaıǵa, Shyńǵystaıyna kóz tastap turǵandaı.
Kópshiliktiń kóńilinen shyqqan jańa eskertkishtiń avtorlary – belgili músinshiler Nurbol Qalıev pen Meıram Baımuhanov. Qalamger bolmysy men tulǵasyn sıpattaıtyn músin qoladan quıylǵan. Eskertkishtiń tuǵyry tutas granıtten soǵylǵan, jalpy bıiktigi – 4, 8 metr.
– Músin soǵýdy oqýshy kezden bastaǵam. Osy kúnge deıin oblys kóleminde on shaqty músinim tuǵyrǵa qondy. Olardyń qatarynda Qunanbaı, Abaı, Oralhan, Baımurat batyr qatarly tulǵalardyń eskertkishteri bar. Osy Oralhan Bókeı bıýstin soǵýǵa jarty jyl ýaqytymyz ketti. Eskertkishti jasaý barysynda qalamgerdiń minezin, bolmysyn, asqaqtyǵyn ashýǵa tyrystyq. Burynǵy Oralhan betonnan soǵylsa, bul jolǵy Oralhan – qoladan. Tuǵyry túgel granıtten jasalǵan, – deıdi Nurbol Qalıev.
Shahar basshysy Jaqsylyq Omardyń aıtýynsha, jazýshy músini turǵan О́tepov kóshesine Oralhan Bókeıdiń esimi berilýi múmkin. Ol jóninde onomastıka komıssııasyna halyqtan usynys-pikirler túsip jatyr. Eger bul kóshege jazýshynyń aty berilse, shyǵarmashylyq úılesim tabar edi. О́ıtkeni Oralhan Bókeı atyndaǵy №44 mektep te osy kóshede ornalasqan.
Eskertkishtiń ashylý saltanatyna qatysqan zııaly qaýym ókilderi de músinniń burynǵydan mazmundy shyqqanyn qýanyp qaıtty.
– Elge, jerge eńbegi sińgen tulǵany urpaǵy umytpaýy úshin eskertkish kerek-aq. Ekinshiden, músinshiniń sheberligi de osyndaıda tanylady. Búgin saltanatty túrde ashylyp otyrǵan jazýshynyń keýde músini jaqsy shyqqan, – dedi jazýshy Álibek Qańtarbaev.