QR Premer-Mınıstriniń orynbasary Roman Sklıar el Úkimeti júzege asyryp jatqan Prezıdent Joldaýyn iske asyrý sharalary týraly baıandady, dep jazady Egemen.kz.
Qazaqstan Úkimeti óńirlik saıasat pen aýmaqtyq damytýdy jetildirýdi josparlap otyr.
«Eldiń damýy óńirlerdiń teńgerimdi damýy negizinde ǵana múmkin bolady. Jyl sońyna deıin Qazaqstan Respýblıkasynyń 2025 jylǵa deıingi aýmaqtyq damý jospary qabyldanady, ol óńirlik standarttar júıesi negizinde «ınfraqurylym adamdarǵa» qaǵıdatyn iske asyrýǵa baǵyttalǵan», dedi R.Sklıar.
Roman Sklıar bul qaǵıdattyń ınfraqurylymdy, onyń ishinde kólik, áleýmettik, kommýnıkasııalyq jáne energetıkalyq ınfraqurylymdy damytýda mańyzdy ekenin túsindirdi.
Úkimet qalalar men aýyldyq eldi mekenderdi damytýda kásipkerlikti qoldaý, «zákirlik jobalardy» iske asyrý arqyly ekonomıkany ártaraptandyrý, ınjenerlik ınfraqurylymdy salý jáne jańǵyrtý, kóliktik baılanys máselelerin sheshý, áleýmettik-ekonomıkalyq damýdyń keshendi josparlaryn iske asyrý jáne t.b. máselelerge nazar aýdarady.
2020 jyldyń qorytyndysy boıynsha respýblıka halqynyń 94%-y sýmen qamtamasyz etilgen. Bul 17,7 mln adam. Memleket basshysy alǵa qoıǵan mindetterdi oryndaý úshin 1,3 mln-ǵa jýyq el azamaty turatyn 1 922 aýylda sýmen jabdyqtaý jelileri men sý tazartý júıeleriniń qurylysy jalǵasady. Osylaısha, 2025 jylǵa qaraı el halqy 100% taza aýyz sýmen qamtamasyz etiledi.