Qazaqstandyq, álemniń 47-raketkasy Iýlııa Pýtınseva Astana Open WTA 250 týrnıriniń jartylaı fınalyna shyqty, dep habarlaıdy Egemen.kz QTF baspasóz qyzmetine silteme jasap.
Osy dodanyń birinshi raketkasy bolyp tirkelgen qazaqstandyq tennısshi shırek fınalda dúnıejúzilik reıtıngte 160-orynda turǵan reseılik Anastasııa Gasanovamen kezdesti.
Birinshi sette Pýtınseva 6:3 esebimen basymdylyq kórsetti. Ekinshisinde qarsylasy ese qaıtardy - 6:4. Úshinshi, sheshýshi partııada Iýlııa Pýtınseva Gasanovany tas-talqan etti - 6:0.
Eki saǵattan astam ýaqytqa sozylǵan matchta Pýtınseva 2 eıs jasap, 18 breık-poınttyń segizin paıdalana bildi. Qarsylasy 1 eıs, 4 breıkten asa almady.
Pýtınseva fınalǵa shyǵý úshin álemniń 80-raketkasy, taǵy bir reseılik Anastasııa Potapova nemese odan alty satyǵa tómen turǵan shvesııalyq Rebekka Petersonnyń bireýimen talasady.