Atyraý oblystyq Densaýlyq saqtaý basqarmasy kóshedegi dárethanaǵa tastalǵan náresteniń jáne keıinnen tabylǵan onyń anasynyń jaǵdaıyn aıtty, dep habarlaıdy Egemen.kz.
Oblystyq Densaýlyq saqtaý basqarmasy baspasóz qyzmetiniń aqparatyna súıensek, 3 qazanda kóshedegi dárethanadan tabylǵan shaqalaq Inder aýdandyq aýrýhanasynyń bosaný bóliminde jatyr.
«Náresteniń jynysy – er. Bala aýrýhanaǵa túskenge deıin sýyqtap qalǵan. Dárigerler náresteniń ómirin saqtap qalý úshin medısınalyq em-dom sharalaryn júrgizdi. Qazir balanyń jaǵdaıy turaqty, alaıda, ortasha aýyr dep baǵalanyp otyr.
Al, náresteniń anasy – Inder aýdanynyń 1990 jylǵy turǵyny aýdandyq aýrýhananyń bosanýdan keıingi bólimine jatqyzyldy. Qazir jańa týǵan shaqalaq ta, anasy da dárigerlerdiń baqylaýyna alyndy. Olarǵa qajetti emdeý sharasy kórsetilip jatyr», dep habarlady basqarmanyń baspasóz qyzmetinen.
Eske salaıyq, buǵan deıin Atyraý oblysynda kóshedegi dárethanadan jańa týǵan náreste tabylǵanyn habarlaǵan bolatynbyz.