Prezıdent janyndaǵy Ortalyq kommýnıkasııalar qyzmeti alańynda «Qoǵamdyq keńesterdiń halyq únine qulaq asatyn memleket tujyrymdamasyndaǵy róli» taqyrybynda sarapshylar brıfıngi ótti. Jıynǵa Aqparat jáne qoǵamdyq damý vıse-mınıstri Bolat Tilepov, TALAP qoldanbaly zertteýler ortalyǵynyń dırektory Rahym Oshaqbaev, osy ortalyqtyń atqarýshy dırektory Áset Jarqynov, «Qoǵamdyq keńester ınstıtýtyn damytý» jobasynyń jetekshisi Erik Batyrhanov qatysty.
Vıse-mınıstr Bolat Tilepov eń aldymen qoǵamdyq keńester ókilettiginiń keńeıýine toqtalyp ótti. «Qoǵamdyq keńesterdiń ókilettigi birshama keńeıtildi. Qazir bul jóninde zańnamalyq erejeler men nusqaýlyqtar ázirlenip, búkil máslıhattarǵa, memlekettik organdar men qoǵamdyq keńesterdiń ózderine taratyldy. Keńes qurý úrdisi qaıta qaraldy. Endigi jerde olardyń quramynyń 70 paıyzy úkimettik emes uıym ókilderi men belsendi azamattardan turýy tıis», dedi ol.
Qoǵamdyq keńesterdiń jumysyn retteıtin ýákiletti organ – Aqparat jáne qoǵamdyq damý mınıstrligi ekenin eskerte kele, jyl sońyna deıin Prezıdentke osy baǵytta atqarylǵan jumystardyń esebi Ulttyq baıandama túrinde ótkiziletinin habarlady. «Jyl saıyn Ulttyq baıandama ázirleý tájirıbesi qolǵa alyndy. Bıyl el Prezıdentine alǵash ret usynylatyn bul qujat qazir aıaqtalyp qaldy», dedi B.Tilepov. «О́zderińiz bilesizder, qoǵamdyq keńes ınstıtýty 5 ınstıtýsıonaldyq reforma sheńberinde 2015 jyly engizilgen. Osy ýaqyt ishinde tájirıbe kórsetkendeı, olar qoǵam men bıliktiń arasyn jalǵaýshy retinde óziniń tıimdiligin, jalpy qoǵam ómirine qajettiligin dáleldeı bildi. Mysaly, osy 5 jylda qoǵamdyq keńes tarapynan 20 myńnan astam normatıvtik qujat ótken bolsa, sonyń árbir onynshysy nemese 2 myńnan astam qujat keńesten ótpeı, jetildirý úshin keri qaıtarylǵan. Iаǵnı azamattardyń ómirine tikeleı áser etetin bul sapasyz qujattardyń kemshiligi der kezinde anyqtalǵan dep aıtýǵa bolady», dedi vıse-mınıstr.
Mınıstrlik ókiliniń aıtýynsha, qazir memlekettik organdar basshylary qoǵamdyq keńester aldynda esep bere bastaǵan. «Taǵy bir mysal, jyl saıyn 1,5 myń memlekettik laýazym ıesi qoǵamdyq keńes aldynda esep beredi. Bul – týyndaǵan máseleler men sheshimin tappaı júrgen suraqtarǵa jaýap alý múmkindigi. Osy 5 jylda memlekettik qyzmettiń sapasyna qoǵamdyq monıtorıng aıasynda myńnan astam zertteý jasalyp, barshaǵa ortaq óte ózekti suraqtardy ashyq talqylaý nátıjesinde uzyn sany 2 myńnan astam másele kóterildi. Mine, osynyń bári – kópshiliktiń ortaq máselesine kóz jumbaı, qashanda minberden usynysyn jetkize biletin bizdiń belsendi azamattarymyzdyń aqysyz negizde atqarǵan úlken eńbeginiń jemisi, jalpy azamattyq qoǵamnyń jeńisi. Sondyqtan da Prezıdenttiń bastamasymen «Qoǵamdyq keńes týraly» zańǵa tıisti ózgerister men tolyqtyrýlar engizilip, osy jyldyń basynan bastap qoldanysqa endi», dedi vedomstvo ókili.
Odan bólek jıyn barysynda qoǵamdyq keńesterdiń jumysyn retteıtin kazkenes.kz atty biryńǵaı saıt ázirlengeni málim boldy. «Qoǵamdyq keńestiń kúndelikti atqaryp júrgen jumysyn elge keńinen jetkizýdiń mańyzy óte zor jáne dástúrli aqparat kózderimen onyń bárin qamtý óte qıyn. Azamattar óz máselesimen qoǵamdyq keńesterge júginýi úshin másele kóterip, onyń sheshimin qadaǵalap otyrýy maqsatynda biryńǵaı qoldanýǵa óte yńǵaıly aqparat resýrsynyń bolýy óte mańyzdy. Sol sebepti mınıstrliktiń tapsyrysymen kazkenes.kz saıtynyń jobasy jasalyp, búgin, mine, nazarlaryńyzǵa usynylyp otyr», dedi B.Tilepov.
TALAP qoldanbaly zertteýler ortalyǵynyń dırektory R.Oshaqbaev qoǵamdyq keńesterdiń quramy men belsendiligi týraly pikirin bildirdi. «Qoǵamdyq keńes qyzmetine baılanysty birqatar problema bar. Birinshi kezekte, bul qoǵamdyq keńesterdiń quramyna baılanysty. Basshylardyń qoǵamdyq keńes quramyn ózine barynsha qolaıly etip jasaqtaýǵa tyrysatyny týraly shaǵymdar kóp boldy. Shaǵymdanýshylardyń aıtýynsha, qolaısyz suraq qoıatyn adamdardy keńeske kirgizbeýge tyrysatyn kórinedi», dedi sarapshy.
Onyń sózine qaraǵanda, bul másele respýblıkalyq deńgeıde kóp talqylanyp, naqty sheshim qabyldanǵan. «Nátıjesinde, Aqparat jáne qoǵamdyq damý mınıstrligi tıisti zańǵa tolyqtyrýlar engizý jóninde bastama kóterip, qujat jobasyn jasady. Bul qoǵamdyq keńes quramyn saılaý prosesin birinshi basshylardyń qalaýy men yqpalynan edáýir táýelsiz etýge múmkindik beredi», dedi ol.
Sondaı-aq ol kazkenes.kz portalynyń qoǵamdyq keńes ınstıtýtyn damytýdaǵy róline toqtaldy. «Bir jaǵynan, bul qoǵamdyq keńes músheleriniń belsendi emestigine baılanysty bolýy, ekinshi jaǵynan olardyń qyzmeti týraly aqparat jetispeýi múmkin. Osynyń aıasynda biz Aqparat jáne qoǵamdyq damý mınıstrliginiń biryńǵaı portal ashý bastamasyn quptaımyz. Kazkenes.kz portaly sııaqty barsha qoǵamdyq keńesterdiń qyzmeti týraly aqparat beretin biryńǵaı alań qurý bizdiń zańnamada kózdelgen», dedi R.Oshaqbaev.