QR Eńbek jáne halyqty áleýmettik qorǵaý mınıstri Serik Shápkenov Úkimet otyrysynda Mańǵystaý oblysynyń áleýmettik-ekonomıkalyq damýynyń 2021-2025 jyldarǵa arnalǵan keshendi josparyn iske asyrý aıasynda qarastyrylǵan halyqty jumyspen qamtý sharalary týraly aıtty, dep jazady Egemen.kz.
Mınıstr Mańǵystaý oblysynda 720 myń turǵyn baryn, onyń ishinde 399 myń adam eńbekke qabiletti jasta ekenin atap ótti. Jumys kúshiniń sany 324 myńnan astam adamdy quraıdy. 308 myńnan astam adam jumysqa ornalastyrylǵan. Jumyssyzdyq úlesi 4,9%-dy quraıdy.
«Mańǵystaý oblysynyń áleýmettik-ekonomıkalyq damýynyń 2021-2025 jyldarǵa arnalǵan keshendi jospary aıasynda 167 jobany júzege asyrý josparlanǵan. Onyń ishinde áleýmettik ınfraqurylymnyń - 55 obektisi, turǵyn úı jáne kommýnaldyq sharýashylyqtyń - 39 obektisi, 27 ónerkásiptik obekt, týrızm salasynyń 31 obektisi bar. 2025 jylǵa deıin óńirde 60 myńnan astam jańa jumys ornyn, onyń ishinde 25 myńǵa jýyq turaqty jumys ornyn qurý josparlanǵan», dedi Serik Shápkenov.
Mınıstr Memleket basshysynyń óńirge jumys sapary barysynda keshendi jospar aıasynda 18 jańa mektep jáne Aqtaý qalasynda 4200 oryndyq jańa úlgidegi 6 zamanaýı mektep salýdy tapsyrǵanyn eske saldy.
«Bıyl Jumyspen qamtýdyń jol kartasy aıasynda 2 myń oqýshyǵa arnalǵan 3 mekteptiń qurylysy júrgizilýde. Sondaı-aq Aqtaý qalasynda KOS-1-den KOS-2-ge deıingi káriz kollektorynyń jáne «jyly plıajǵa» sý qubyrynyń qurylysy boıynsha jobalar bastaldy. Bul jobalar óńirde jumys oryndaryn ashýǵa, sondaı-aq týrızm salasynda qosymsha 10 myńǵa jýyq jańa jumys ornyn qurýǵa múmkindik beredi», dedi Eńbekmıni basshysy.
Budan basqa, «Nur Otan» partııasynyń saılaýaldy baǵdarlamasyn oryndaý jónindegi jol kartasyn iske asyrý sheńberinde 2025 jylǵa deıin óńirde 150 myń turǵyn jumyspen qamtylady. Oqytýǵa 7 myńǵa jýyq adam qatysady. Onyń ishinde 3,5 myńǵa jýyq adam Elektrondyq eńbek bırjasy arqyly jańa mamandyqty ıgerýge jáne onlaın-kýrstarda biliktiligin arttyrýǵa múmkindik alady. Taǵy 3,5 myń adam «Bastaý Bıznes» jobasy boıynsha kásipkerlik negizderin meńgeredi.
«Keshendi jospar aıasynda qabyldanyp jatqan sharalar 2025 jylǵa qaraı óńirdegi jumyssyzdyqty 4,8%-dan aspaıtyn deńgeıde ustap turýǵa múmkindik beredi», dep atap ótti mınıstr.
Serik Shápkenov eńbek janjaldaryn sheshý jáne boldyrmaý boıynsha júrgizilip jatqan jumystar týraly habardar etti. Onyń aıtýynsha, Mańǵystaý oblysynda 11 myń kásiporyn jumys isteıdi. О́ńirde ortasha jalaqy 353 myń teńgeni quraıdy.
Aýtstaffıng boıynsha qyzmet kórsetetin kásiporyndarǵa jeke monıtorıng júrgiziledi. Búgingi tańda osyndaı 44 kásiporynnyń 25 myń jumyskeri bar.
«Jyl basynan beri oblys boıynsha 22 eńbek janjaly tirkeldi, bul tirkelgen janjaldardyń jalpy sanynyń 80%-yn quraıdy. Qyzmetkerler qoıatyn negizgi talap – munaı servıstik kásiporyndarda jalaqy deńgeıin arttyrý jáne eńbek jaǵdaılaryn jaqsartý. Búginde barlyq eńbek daýy oń sheshimin tapty», dedi Serik Shápkenov.
Mınıstr Eńbek jáne halyqty áleýmettik qorǵaý mınıstrliginiń keshendi jospary aıasynda «Samuryq-Qazyna» AQ-men birlesip, merdigerge beriletin tapsyrystyń kólemin 25%-dan aspaıtyn mólsherde shekteý, tenderge qatysatyn kompanııalarǵa qoıylatyn biliktilik talaptaryn qatańdatý, satyp alý qaǵıdalaryna ózgerister engize otyryp, konkýrs ótkizý kezinde joǵary jalaqy tóleıtin fırmalarǵa qosymsha jeńildikter berý sııaqty sharalar kózdeletinin aıtty.
Kásiporyndarda, onyń ishinde aýtstaffıngke jumyskerler usynatyn kásiporyndarda eńbek zańnamasynyń saqtalýyn, jalaqy men eńbek jaǵdaılaryndaǵy aıyrmashylyqtarǵa jol bermeýdi baqylaý qamtamasyz etiletin bolady.
«Qabyldanyp jatqan sharalar 2025 jyldyń sońyna deıin: eńbek janjaldarynyń sanyn azaıtýdy, anyqtalǵan buzýshylyqtardyń úles salmaǵyn 20%-ǵa deıin tómendetýdi, óndiristik jaraqattaný deńgeıin 10%-ǵa deıin tómendetýdi qamtamasyz etýge múmkindik beredi», dep túıindedi mınıstr.