Qazaqstan mektepterinde úsh myńǵa jýyq robototehnıka kabıneti ashyldy, dep jazady Egemen.kz.
Kabınette osy baǵyt boıynsha qyzyǵýshylyq tanytatyn oqýshylar úshin arnaıy úıirmeler ótkiziledi. Barlyq kabınette qajetti kompıýterlik jabdyqtar jáne oqý quraldary bar.
«Aıta keteıik, mınıstrlik tarapynan pedagogterdiń robototehnıka salasyndaǵy bilimi men daǵdylaryn jetildirý barysynda jumys júrgizildi. Sońǵy eki jylda eki myńǵa jýyq muǵalim robototehnıka kýrsynan ótti», dep habarlaıdy QR BǴM baspasóz qyzmeti.
«Robototehnıka arnaıy konstrýktorlardyń kómegimen robot jasaý degendi bildiredi. Árbir oqýshy tek dáris tyńdap qana qoımaı, robotty óz betinshe jınaı alady. Muǵalimder balalardy mehanıkanyń negizderimen tanystyryp, olardyń praktıkalyq daǵdysyn damytady. Balalar bul proseske qatysý barysynda asqan qyzyǵýshylyq tanytyp, jobalaryn óz betinshe qurýdy úırenedi. Bul balalardyń boıyndaǵy jaýapkershilik, tártip jáne zeıindi damytady. Sonymen qatar robototehnıka balalardyń fızıka, matematıka jáne aqparattyq tehnologııalar salasyndaǵy bilimin jetildiredi», dedi QR BǴM Mektepke deıingi jáne orta bilim komıtetiniń tóraıymy Gúlmıra Kárimova.
Almas Sarbozov Qostanaı oblysy Amantoǵaı aýylyndaǵy shaǵyn jınaqty aýyl mektebinde ınformatıka pániniń muǵalimi bolyp isteıdi. Eki jyl buryn ol aýyl oqýshylaryna arnalǵan robototehnıka úıirmesin ashty. Eger bastapqyda úıirmege 3-4 bala ǵana qyzyǵýshylyq tanytsa, qazir oǵan ár túrli jastaǵy 30-ǵa jýyq bala qatysady.
«Balalarǵa paıdamdy tıgizgim kelip, robototehnıka úıirmesin ashtym. Mekteptegi kabınet jabdyqtalǵan. Qazir oqýshylarymyz túrli konkýrstarǵa qatysyp, júldeli oryndarǵa ıe bolyp júr. Pandemııa kezinde balalar ózdiginen iske qosylatyn sanıtaızer oılap tapty. Oqýshylar tıisti baǵdarlamany ázirlep, qurylǵyny jınady. Adam sanıtaızerge jaqyndaǵan kezde ol avtomatty túrde iske qosylady. Jaqyn arada oqýshylarymyz elimizdiń atynan halyqaralyq jarystarǵa qatysyp, jumysyn kópshilikke tanystyrady dep úmittenemin», dedi robototehnıka úıirmesiniń jetekshisi Almas Sarbozov.