Aqqýdy atqan aramza ustaldy

Aqqýdyń taza, tákáppar sulý qalyby ǵana emes syńaryna eshqashan aınymaıtyn beriktigi de mahabbattyń sımvoly ispettes bolyp, buryn-sońǵy aqyndardyń bárine shabyt týdyrǵan... Osy oraıda bıyl ǵana kólge qaptaǵan baldyrlardy kıeli aqqý qustyń tumsyǵymen syrtqa shy­ǵaryp júrgen «tazalyq qyzmeti» de talaı adamdy tánti etkeni eske túsedi. Bul kórinis áleý­met­tik jelilerde keńinen taralǵan-dy.

Aqqýdyń tazalyǵy sondaı, mańyna qaz-úırekterdi de jolatpaı, qýyp tastaıdy. Osyn­daı qasıetteriniń bári halyq arasynda ony aıryqsha qusqa teńeıtin ańyzdar men erte­giler týǵyzǵan. Onyń alqymy qyzyl kele­tin erekshe suńqyldaıtyn bir túri «Qy­zyl kitapqa» da engizilgen.

Mine, osyndaı ǵajap qusty jýyrda sol­tústikqazaqstandyq bir sýyqqol ashqaraq atyp alyp, qyl tamaǵynan ótkizbek bolypty. Aqqý ańshydan qoryqpaıdy, adamdar ózin qorǵaıtynyn sezetin bolsa kerek, ol kóldiń ja­ǵasyna deıin kelip, emin-er­kin júzip-jyljyp júredi. Sony paı­dalanǵan ańshysymaq asyl qusty atyp óltiripti.

Oqıǵa Aıyrtaý aýdanynyń aýmaǵynda bolǵan. Jergilikti polısııa men qoryqshylar birlese reıd atqaryp júrgende ormannyń baýyrynan suńqyldaq aqqýdyń qaldyqtaryn tapqan. Osy jerde qysqa otyn daıyndaý brıgadasy eńbek etip jatqan. Oqıǵa ornyna kelgen jedel-tergeý brıgadasy jumysshylardyń biriniń «Qyzyl kitapqa» engen qusty atýǵa qatysy bar ekendigin anyqtady. Anyqtalǵan azamat Ǵ.Músirepov aýdanynyń 32 jas­taǵy turǵyny bolyp shyqty. Onyń turǵylyqty mekenin tekserý barysynda aqqýdyń qaldyqtary, dara uńǵyly 16 kalıbrli «IJ-18»  myltyǵy, atylǵan gılza men oqtalǵan patron tabylǵan. Qazir atalǵan fakti boıynsha Qylmystyq kodekstiń 337-baby boıynsha qylystyq is qozǵaldy. Bul bap janýarlardyń sırek kez­desetin jáne quryp ketý qaýpi tóngen túr­lerine, sondaı-aq paıdalanýǵa tyıym salynǵan ja­nýarlarǵa qatysty «zańsyz ańshylyq» degen jaýapkershilikti kózdeıdi.

«Búgingi tańda oblysta eko­logııalyq qylmys salasyndaǵy 17 qylmystyq is tir­keldi, 414 ań aýlaý qaǵıdalaryn buzý jáne 273 balyq aýlaý qaǵıdalaryn buzý­shylyq anyq­­taldy», deıdi Jergilikti polısııa qyz­meti bas­qarmasynyń bastyǵy, polısııa pod­polkovnıgi Aıdyn Baımatov.