Mańǵystaýlyqtar izgi saparmen Ýkraına elinde boldy. О́ńir basshysy N.Noǵaevtyń tapsyrmasymen, Qazaqstannyń Ýkraınadaǵy elshisi D.Káletaevtyń shaqyrýymen T. Shevchenko memlekettik mýzeı-qoryǵyndaǵy «Qazaq buryshyn» qalpyna keltirip, jyl saıyn ótetin lX halyqaralyq Shevchenko oqýlaryna qatysý úshin Kanev qalasyna sapar tórt kúnge sozyldy.
Mańǵystaý oblystyq mádenıet basqarmasynyń basshysy P.Sarmýrzıannyń aıtýynsha, mýzeıdegi T.Shevchenkonyń qazaq dalasyndaǵy ómirin beıneleıtin ekspozısııany negizinen kıiz úı men onyń jabdyqtary, ulttyq kıim quraıdy eken. Úı ótken ǵasyrdyń 50-jyldary jasalyp, 80-jyldarynyń aıaǵynda Mańǵystaý oblysynyń Jetibaı aýylynan ákelingendigin sol kúnderdiń tiri kýágeri, mýzeıdiń bas qor saqtaýshysy, mýzeıde 1972 jyldan beri qyzmet istep kele jatqan Anna Ivanovna aıtqan.
Bir zamanda sán-saltanatymen tolyq tigilgen úı ýaqyt óte mýzeı zaldarynyń qaıta jasaqtalýyna baılanysty, múldem jınalyp qoıylǵan. Bertinde elshi D.Káletaevtyń aralasýymen jartylaı kórmelenipti. Mýzeı sýretshisi Alekseı Shevchenko «Qazaq buryshyn» ınternet jelisinen kórgen beıneleri arqyly jańǵyrta jasaǵan. Mańǵystaýlyqtar mýzeı basshylyǵynyń ruqsatymen kıiz úıdi qaıta tigýge talaptanǵanmen, orynnyń tarlyǵyna baılanysty shańyraǵyn kótere almaǵan, sondyqtan olar qazaq dalasynan barǵan buıymdarmen «Qazaq buryshyn» tolyqtyra alǵandaryna qýanyshty.
T.Shevchenko memlekettik mýzeı-qoryǵynyń aýmaǵyna kiretin Taras taýynyń basyndaǵy aqyn zıratyna gúl shoqtaryn qoıyp, taǵzym etken mańǵystaýlyqtar aqynnyń týǵan jerine oralýyna arnalǵan IX halyqaralyq Shevchenko oqýlaryna qatysty.
– Konferensııany Qazaqstan men Ýkraına birlesip ótkizip keledi. Bul eki eldiń myzǵymas yntymaqtastyǵynan habar bergendeı. Pandemııaǵa baılanysty onlaın formatta ótken jıynǵa elimizdiń birneshe ǵalymdary, qoǵamdyq birlestikter ókilderi qatysty. Konferensııany aqyn, jazýshy, pedagogıka ǵylymynyń kandıdaty, mýzeı basshysy V.Kovalenko ashyp, alystan at arytyp kelip, mýzeı ekspozısııasyn jańǵyrtqanymyz úshin alǵysyn bildirdi. Qarymta retinde Fort-Shevchenko qalasyndaǵy T.Shevchenko memorıaldyq mýzeıine dep ýkraın ulttyq kıimin, turmystyq zattaryn syılady. Bulardy mýzeı qyzmetkerleri óz úılerinen ákelipti. Elshiliktiń birinshi hatshysy Láılá Kesikova mýzeıdiń bir top qyzmetkerine Qazaqstan Respýblıkasy Mádenıet jáne sport mınıstri men Ýkraınadaǵy Qazaqstan elshisiniń Alǵys hattaryn tapsyrdy, – dedi mádenıet basqarmasynyń basshysy.
Á.Kekilbaıuly atyndaǵy Mańǵystaý oblystyq tarıhı-ólketaný mýzeıiniń dırektory S.Qudaıbergen men Shevchenko mýzeı-qoryǵynyń basshysy V.Kovalenko mádenı yntymaqtastyqty damytý maqsatyndaǵy mýzeıaralyq memorandýmǵa qol qoıyp, eki ujym arasyndaǵy baılanysty nyǵaıta túsýge kelisti.
Kıevte mańǵystaýlyq delegasııany elshi Darhan Káletaev qabyldap, atqarylǵan iske rızashylyǵyn bildirýmen qatar, bolashaqta birlesip atqarar jumystar jaıyn qozǵady.
Ýkraına mýzeıleriniń jumysymen tanysýǵa, tájirıbe almasýǵa qyzyqqan mańǵystaýlyqtar Ýkraına Ulttyq ǵylym akademııasynyń Ulttyq ǵylymı-tabıǵattaný mýzeıinde boldy. Bul mýzeı – óz ishinde tórt birdeı murajaıdy biriktirgen ekspozısııalyq-aýmaqtyq keshen. 4 qabattan turatyn mýzeıde «Tabıǵat», «Zoologııa», «Arheologııa», «Geologııa» mýzeıleri ornalasqan. 1966 jyly ashylǵan mýzeı álemniń túkpiri men jyqpylynan, sýy men nýynan ákelingen qurt-qumyrsqa, jándikterdiń qatyrmalaryna, janýarlar men haıýanattardyń tulyptaryna, súıekterine toly. Tipti ýkraındyqtar bizde kez kelgen adamǵa ruqsat etilmeıtin mýzeı qoryna ózderi bastap baryp, eki saǵattan astam aralatyp, túsinik bergen. Mańǵystaý mýzeıiniń qyzmetkerleri aldaǵy ýaqytta jınaǵan beınematerıaldaryn áriptesterine kórsetip, semınar ótkizýdi josparlap otyr.
Zamanaýı deńgeıde ekspozııalanǵan «Kıev qalasynyń tarıhy» mýzeıi de qazaqstandyq qonaqtardyń qyzyǵýshylyǵyn týyndatypty. Mamandar ózderin qyzyqtyrǵan suraqtaryna jaýap alyp, marqaıyp oraldy.
Endi bekitilgen memorandýmǵa sáıkes eki el, eki mýzeı arasyndaǵy baılanys arnasy keńeıip, tyń jumystarǵa jol ashylady dep kútemiz.