Kenshiler astanasynda daýylpaz aqyn Qasym Amanjolovtyń 110 jyldyq mereıtoıy keń kólemde atap ótilýde. Taıaýda respýblıkalyq deńgeıdegi «Sen netken baqytty ediń, keler urpaq...» atty dástúrli Qasym oqýlar aqtalyp, poezııa jáne vokal janrlary boıynsha ótken saıystyń jeńimpazdary anyqtaldy, dep jazady Egemen.kz.
Atalǵan is-shara Qasym eskertkishine gúl shoqtaryn qoıýmen bastalǵanyn aıta ketken jón. Bul jerde jas aqyndar óleń oqyp, aqyn rýhyna jyrmen taǵzym etti. Odan keıin kúıshi Qaırat Aıtbaevtyń qurastyrýymen jaryqqa shyqqan, ishine Qasymnyń óz ánderi jáne onyń óleńderine jazylǵan áýenderdiń mátini men notasy engen «Bir názik sáýle» toptama kitabynyń tusaýy kesildi.
Jalpy, oblystyq Mádenıet, arhıvter jáne qujattama basqarmasynyń qoldaýymen «Rýhanı jańǵyrý» baǵdarlamasy aıasynda ótken bul konkýrsta elimizdiń túpkir-túpkirinen, sondaı-aq, Polsha elinen 118 úmitker shyǵarmashylyq shama-sharqyn baıqap kórgen bolatyn.
«Dúnıege keler áli talaı Qasym...» atalymy boıynsha aqyndar arasyndaǵy baıqaýdyń bas júldesi qyzylordalyq Aqjol Doshanovqa buıyrdy. Qazylar alqasy birinshi orynǵa qaraǵandylyq jas aqyn Jálel Shalqar laıyqty dep tanysa, ekinshi júldeniń ıegeri bolyp Balqash qalasynyń aqyny Maqsat Kúzemhanov atandy. Al úshinshi oryndy Nur-Sultan qalasy atynan qatysqan Aızada Rahymjanova, Almaty oblysynyń aqyny Arshyn Nurbaqyt jáne Shymkentten kelgen Araılym Muratalıeva ózara bólisti.
«Jas dáýren» atalymy boıynsha ótken óner saıysynda qaraǵandylyq Aıbek Rymǵalı bas júldeni jeńip aldy. Birinshi orynǵa elordalyq Syrym Muhametjanov ıelik etse, ekinshi júlde de bas qala atynan baq synaǵan Kámshat Turarbekovanyń enshisine tıdi. Pavlodarlyq Janbolat Baısoltan, Qaraǵandy qalasynyń ókili Qýandyq Tókenov jáne soltústikqazaqstandyq ónerpaz Erasyl Alpysbaıǵa júldeli úshinshi oryn qyldaı bólinip berildi.
Eske salar bolsaq, Qasym Amanjolov oqýlary alǵash ret Qaraǵandyda 2011 jyldyń 11 qazanynda aqynnyń 100 jyldyq mereıtoıyn atap ótý aıasynda uıymdastyrylǵan bolatyn.
Budan keıin kezek Qasym Amanjolov atyndaǵy «Dúnıege keler áli talaı Qasym…» respýblıkalyq músháırasyna keldi. Qaraǵandy oblystyq ákimdiginiń, oblystyq Tilderdi damytý jónindegi basqarmanyń uıymdastyrýymen ótken bul ádebı baıqaýda 18-45 jas aralyǵyndaǵy 100-ge jýyq úmitker baq synady.
Aqyndar jyr saıysyna Qasymnyń ómiri men shyǵarmashylyǵyn, el táýelsizdigin jáne erkin taqyrypty ózek etken óleńderin usyndy. Quramyna Abaı atyndaǵy memlekettik syılyqtyń ıegeri Serik Aqsuńqaruly, belgili aqyndar Ǵalym Jaılybaı, Svetqalı Nurjan, «Qasym» respýblıkalyq qoǵamdyq-ádebı jýrnalynyń bas redaktory Serik Saǵyntaı, Qazaqstan Jazýshylar Odaǵy Qaraǵandy oblystyq fılıalynyń dırektory Janat Jańqashuly engen qazylar alqasy júzden júırek shyqqan 12 aqyndy iriktep aldy.
Sonymen, qazylardyń sheshimimen «Dúnıege keler áli talaı Qasym…» respýblıkalyq músháırasynyń jeńimpazy bolyp Ǵylymnur Kádirbaı atandy. Birinshi báıge Ásel Ospanǵa buıyrsa, ekinshi júlde Egemen Qazaqstan gazetiniń mádenıet jáne rýhanııat bóliminiń meńgerýshisi Mıras Asanǵa berildi. Al úshinshi júldeli oryn úsh aqynǵa – Eseı Jeńisuly, Aızada Raqymjanqyzy jáne Asyl Sultanǵazy berildi.
Sonymen qatar, Dáýitáli Stambekov, Kárim Saýǵabaı, Búrkit Ysqaquly, Saılaýhan Nákenov jáne Jeńis Qashqynov atyndaǵy arnaıy júldelerge birqatar aqyn ıe boldy.
Aıta ketý kerek, bıyl baıqaýdyń júlde qory jyldaǵydan eki esege kóbeıgen. Mysaly, osy joly bas báıgeni jeńip alǵan aqynǵa tigilgen júlde 1 mln teńgeni qurady.
Jeńimpazdar men júldegerlerge aqshalaı syılyqtar men Qasym Amanjolovtyń sózine jazylǵan ánderdiń basyn quraǵan «Qasymnyń ánderi-aı» kúıtabaǵy jáne aqynnyń sózine jazylǵan ánderden turatyn «Bir názik sáýle» kitaby tartý etildi.
Munan soń, daýylpaz aqynnyń eskertkishi oryn tepken Qasym Amanjolov atyndaǵy kóshege 110 qaıyń shybyǵy egildi.
Bul – Alashtyń aıaýly uly, ardaqty aqynynyń 110 jyldyq toıynyń qurmetine oraılastyrylyp istelingen izgi sharýanyń biri boldy.