Nur Otan Tóraǵasynyń Birinshi orynbasary Baýyrjan Baıbek Túrkistan oblysyna jumys sapary barysynda óńirde partııanyń saılaýaldy baǵdarlamasynyń oryndalý barysymen tanysyp, birqatar áleýmettik, mádenı nysandarda boldy, dep habarlaıdy Egemen.kz.
«Elbasy Nursultan Nazarbaevtyń birneshe jyl buryn Túrkistandy jańǵyrtý týraly qabyldaǵan tarıhı sheshimi kıeli qalanyń órkendeýine zor serpin bergen erekshe mańyzdy oqıǵa boldy. Túgel túrki táý eter kóne qala jańa mártebege ıe bolǵannan keıin qurylys qarqyndy júrip, qysqa ýaqytta shahar kelbeti qaıta túledi. Záýlim ǵımarattar men zamanaýı áleýmettik-mádenı nysandar boı kóterdi.
Solardyń biri – qasıetti qalada Elbasynyń qoldaýymen salynyp, paıdalanýǵa berilgen Túrkistan mýzykalyq drama teatry. Bul mádenı nysannyń ashylý rásimine Tuńǵysh Prezıdenttiń ózi arnaıy qatysyp, teatr ujymymen kezdesken bolatyn.
Ońtústik óńirge jumys sapary barysynda osynaý óner ordasyna baryp, teatr shymyldyǵyn tuńǵysh ashyp otyrǵan belgili jazýshy, dramatýrg Dýlat Isabekovtiń pesasyna qoıylǵan «Bórte» spektaklin tamashaladym.
Kez kelgen qalanyń máni men mazmunyn arttyratyn, ıntellektýaldyq deńgeıin ósiretin sala – mádenıet, bilim oshaqtary men kórnekti oryndar. Osyǵan oraı Nur Otan partııasynyń Túrkistan qalasy boıynsha saılaýaldy baǵdarlamasynda týrıstik nysandar men kıeli oryndardy damytý, Kúltóbe qalashyǵyn qalpyna keltirý, kórnekti tulǵalary men tarıhı muralaryn tanymal etý sekildi kóptegen jobalardy iske asyrýǵa yqpal etý kózdelgen. Qazirgi tańda Túrkistan mýzykalyq drama teatry, «Uly dala» ortalyǵy, Farab kitaphanasy, etnoaýyl, «Kerýen-saraı» týrıstik kesheni jáne t.b. iske qosylǵan», dep jazdy Baýyrjan Baıbek Instagram-daǵy paraqshasynda.