Pavlodar oblysy Tereńkól aýdanynda qus tumaýynyń shyǵýyna baılanysty karantın engizildi, dep habarlaıdy Egemen.kz.
Respýblıkalyq epızootııaǵa qarsy toptyń mamandary ınfeksııanyń taralýyn boldyrmaý úshin jumys júrgizýde.
«Oblystyq veterınarııa basqarmasynyń málimdeýinshe, 3 qazanda Berezovka aýylynyń turǵyny Voskresenskıı aýyldyq okrýginiń veterınarlyq pýnktiniń meńgerýshisine habarlasyp, 1 qazannan 3 qazanǵa deıin belgisiz sebeptermen 42 qaz ólgeni týraly habarlaǵan. 4 qazanda qustyń ólý faktisi boıynsha veterınarııa basqarmasy men aýmaqtyq ınspeksııa ókilderi Berezovkaǵa baryp, ólgen qazdardan patologııalyq materıaldar aldy. Synamalar qus tumaýyna tekserý úshin Nur-Sultandaǵy Ulttyq veterınarııanyń referenttik ortalyǵyna jiberildi. О́ıtkeni aýladaǵy qustarda bul ınfeksııanyń syrtqy klınıkalyq belgileri bolǵan», dedi basqarmadaǵylar.
8 qazanda saraptama joǵary patogendi qus tumaýynyń dıagnozyn rastady. Sondyqtan aýrýdyń oshaǵyna karantın engizildi. Qustardyń óleksesi mal qorymynda órteý arqyly joıyldy.
Berezovka aýylynda 85 úı bar. Olardyń 36-sy úı qustaryn ustaıdy. Barlyǵy 1106 bas: onyń ishinde 620 taýyq, 186 úırek, 300 qaz bar.
Boljam boıynsha, ınfeksııa kózi - jabaıy qustar. Sebebi, qustar ólerden birneshe kún buryn qus qorada kógershinderdiń óleksesi tabylǵan.
11 qazannan bastap aýylda "Respýblıkalyq epızootııaǵa qarsy top" RMK kómegimen joǵary patogendi qus tumaýyn joıý boıynsha jumys júrgiziletin bolady.
Ielerine ólgen jáne ustalǵan qustardyń quny óteledi.
Aıta ketsek, bıyl maýsym aıynda Soltústik Qazaqstan oblysynda qus tumaýy qaıtadan anyqtalǵan bolatyn.