Qarjy monıtorıngi agenttiginiń elordalyq departamenti Reseı Federasııasynyń azamatyna qatysty artefaktilerdiń ekonomıkalyq kontrabandasy faktisi boıynsha tergeýdi bastady, dep habarlaıdy Egemen.kz.
Reseı Federasııasynyń azamaty Nur-Sultan qalasynyń halyqaralyq áýejaıy arqyly jalpy salmaǵy 2 myń kg-nan asatyn mamonttardyń azýy men júndi múıiztumsyqtardyń múıizin Qytaı Halyq Respýblıkasyna kontrabandalyq jolmen áketýge tyrysqany anyqtaldy.
Taýardy jóneltýshi – Máskeý qalasyndaǵy JShQ dırektory. Paleontologııalyq materıaldardy Qazaqstan Respýblıkasynyń aýmaǵyna ákelý jáne odan ári QHR-ǵa jiberý maqsatynda Nur-Sultan qalasynda JShS tirkelip, dırektory bolyp Reseı Federasııasynyń azamaty taǵaıyndalǵan.
Mamandardyń qorytyndylaryna sáıkes mamonttar men júndi múıiztumsyqtardyń qazba qaldyqtarynyń zerttelgen barlyq bólikteri paleontologııalyq aretfaktilerdiń ǵylymı-tarıhı, mádenı qundylyǵy bar. Zerttelgen qazba qaldyqtarynyń barlyq bólikteriniń quny 173 mıllıon teńgeni quraıdy.
Qoldanystaǵy zańnamaǵa sáıkes mádenı qundylyqtardy Qazaqstan Respýblıkasynan tys jerlerge áketýge tyıym salynady.
Osylaısha, ustalǵan azamat asa iri kólemde ekonomıkalyq kontrabanda jasady degen kúdikke ilindi.
2021 jylǵy 1 qazanda kúdikti ustalyp, sottyń sanksııasymen qamaýǵa alyndy.