Nur-Sultan qalasy KVI boıynsha «qyzyl» aımaqtan qandaı jaǵdaıda shyǵa alatynyn elordanyń bas sanıtarlyq dárigeri Sarhat Beısenova OKQ brıfınginde aıtty, dep habarlaıdy Egemen.kz.
BAQ ókilderi elorda nege jarty jyldan astam ýaqyt KVI boıynsha «qyzyl» aımaqtan shyqpaıtynyn surady. Biraq, oǵan qaramastan qalada kovıdtik stasıonarlar jabylýda: Máselen, eger jazda elordada koronavırýstyq naýqastardy emdeýge arnalǵan tósek-oryn qýaty 4 myńǵa jýyq 16 stasıonar jumys istese, búginde 990 tósek-orynǵa arnalǵan 7 ınfeksııalyq stasıonar jumys istep tur. Osy aptada taǵy bir kovıdtik stasıonardy jabý josparlanyp otyr.
Sarhat Beısenova belgili bir aımaq 100 myń turǵynǵa esepteletin aýrýdyń qarqyndy kórsetkishine baılanysty «qyzyl», «sary» nemese «jasyl» aımaqtarǵa qosylatynyn habarlady.
«Eger ol 100 myń turǵynǵa shaqqanda 100 jaǵdaıdan asyp ketse, onda biz «qyzyl» aımaqta bolamyz. Biz syrqattanýshylyqtyń azaıý úrdisin kórip otyrmyz, biraq bul rette bizde qarqyndy kórsetkish - búgingi kúni 172-ge teń, ıaǵnı bul 100-den joǵary. Sondyqtan biz «qyzyl» aımaqta turmyz», dep túsindirdi ol.
О́z kezeginde Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov qazir stasıonarlar jaǵdaıynda 578 adam em qabyldap jatqanyn aıtty.
«Bul bir dıagnoz úshin óte kóp. Kovıdtik tósekterdi 4 myńnan 990-ǵa deıin, pasıentter sanyn 3 myńnan 600-ge deıin tómendetkenimizge qaramastan, aýrý áli de joǵary. Aýrý áli joıylǵan joq», dedi ol.