1 maýsym – Qazaqstanda Balalardy qorǵaý kúni. Jyl basynan mamyr aıynyń sońyna deıin Qazaqstanda dúnıege kelgen sábılerge qoıylǵan eń tanymal jáne sırek esimder jarııalandy. Ulttyq statıstıka bıýrosynyń málimetinshe, ul balalar arasynda – Alan, al qyzdar arasynda – Aılın esimi kósh bastap tur, dep jazady Egemen.kz.
Bıyl týǵan ul balalardyń ishinde eń kóp qoıylǵan esim – Alan. Bul esim 957 nárestege berilgen. Ekinshi orynda – Álıhan (792 bala), úshinshi orynda – Muhammed (791 bala). Sondaı-aq eń tanymal er balalar esimderiniń alǵashqy ondyǵyna Aısultan, Aldııar, Hamza, Omar, Áltaır, Muhammad jáne Ámir endi.
Qyz balalar arasynda Aılın esimi eń tanymal atandy. Bul esim 1 744 nárestege qoıylǵan. Ekinshi orynǵa – Asylym (1 449 bala), úshinshi orynǵa – Mádına (1 234 bala) jaıǵasty. Eń kóp tańdalǵan qyz esimderiniń qatarynda Tomırıs, Aısha, Aıala, Marııam, Safııa, Aıym jáne Ádııa da bar.
Memleket basshysy Halyqaralyq balalardy qorǵaý kúnimen quttyqtady
Statıstıkada erekshe nazar aýdartqan taǵy bir kórsetkish – sırek qoıylǵan esimder. Jyl basynan beri keıbir esimder tek bir ǵana balaǵa berilgen.
Qyz balalar arasyndaǵy eń sırek esimder qataryna Irıslıqoı, Jızel, Aılısha, Iаraslava, Begaıym, Aqbata, Anara, Asha, Janylsyn jáne Iýldýzzııo endi.
Al ul balalarǵa qoıylǵan sırek esimder qatarynda Kamranbek, Muhamedın, Iýsýfbek, Hasanboı, Bektiles, Raıymhan, Rýzalı, Ál-Álı, Halılla jáne Iаshar bar.
Eske salaıyq, elimizde balalardy kıberbýllıngten qorǵaý sharalary kúsheıtilip jatqany týraly habarlaǵan edik.