Bul kúnderi Taılandtyń Nakhonpathom qalasynda voleıboldan erler arasyndaǵy Azııanyń klýbtyq chempıonaty ótýde.
Bul jarysta Almatynyń «Býrevestnıgi» tabysty óner kórsetýde. Tusaýkeser báskesinde Iraktyń «Soýz Gazynan» 2:3 esebimen jeńilip qalyp, kóńilimizdi biraz jabyrqatqan jerlesterimiz esesine kelesi qos kezdesýde qarsylastaryn oısyrata utty.
Atap aıtsaq, jergilikti «Nahon Radchasıma» men Shrı-Lankanyń «SEB» klýbtarynan 3:0 esebimen basym tústi. Keshe bizdiń jigitter Kýveıttiń «Kazmasymen» kúsh synasty. Úsh settik saıysta almatylyq voleıbolshylardyń ústemdigi esh kúmán týǵyzǵan joq.
Bul oıynda da 3:0 (25:17, 25:20, 25:22) esebi tirkeldi.
Osylaısha, 10 upaıdy qorjynǵa salyp, A tobynda kósh bastaǵan «Býrevestnık» pleı-offqa joldama aldy.