QR Prezıdenti Qasym-Jomart Toqaev ekologııasy nashar qalalardy balamaly energııa kózderine kóshirý jospary týraly pikir bildirdi, dep habarlaıdy Egemen.kz.
«2025 jylǵa qaraı neǵurlym lastanǵan 10 qala gazdandyrylyp, balamaly energııa kózderine aýystyrylatyn bolady. Qazaqstannyń jańartylatyn jáne balamaly energetıkany damytý úshin zor áleýeti bar. Bizdiń boljamdarymyzǵa sáıkes, 2030 jylǵa qaraı energııa teńgerimindegi JEK úlesi kem degende 15%-dy quraýy tıis», dedi Qasym-Jomart Toqaev «Parıj kelisiminiń maqsattaryna qol jetkizý joldary jáne Qazaqstannyń kómirtegi beıtaraptylyǵy» atty halyqaralyq konferensııada.
Sondaı-aq, Prezıdent osy baǵytta qabyldanyp jatqan sharalarǵa toqtaldy.
«Ol úshin biz normatıvtik ortany jetildiremiz, barynsha tartymdy jaǵdaılar jasaımyz. Bizdiń strategııalyq halyqaralyq áriptesterimizben birqatar jobalarǵa belgili bir úmit artamyz. Qazaqstan jasyl qarjylandyrýǵa kóp kóńil bóledi – Astana halyqaralyq qarjy ortalyǵynyń bazasynda «jasyl qarjy ortalyǵy» jumys isteıdi» degen Memleket basshysy qazaqstandyq «Damý» ınstıtýty BUU Damý baǵdarlamasymen birlesip «jasyl oblıgasııalardy» bırjaǵa sátti shyǵarǵanyn eske saldy.
«Bıyl Qazaqstan qor bırjasynda Qazaqstandaǵy balamaly energetıka nysandaryn qarjylandyrý úshin Azııa damý bankiniń jasyl oblıgasııalarynyń 2 ónimi shyǵaryldy», dep túıindedi Prezıdent.