Teatr súıer qaýym úshin kópten kútken óner maıramy! Aldaǵy demalys kúnderi bas qala tórinde Almatynyń Ǵ.Músirepov atyndaǵy Qazaq memlekettik akademııalyq balalar men jasóspirimder teatry ujymy el Táýelsizdiginiń 30 jyldyǵy aıasynda gastroldik saparyn ótkizedi. Talantty trýppa elorda kórermenderine úsh kún boıy qyzyqty qoıylymdaryn tartý etedi.
Q.Qýanyshbaev atyndaǵy akademııalyq qazaq mýzykalyq drama teatry sahnasynda ótetin óner sherýinde 15 qazan kúni I.Jansúgirovtiń «Qulager» saýnd-dramasy, 16 qazanda S.Muratbekovtiń «Jýsan ıisi» jáne qazannyń 17-si kúni Á.Nurshaıyqovtyń «Mahabbat, qyzyq mol jyldar» qoıylymdary kórermen nazaryna usynylady. «Qulager» men «Mahabbat, qyzyq mol jyldar» spektaklderi teatrdyń kórkemdik jetekshisi, jas ta bolsa teatr álemine tyńnan túren salyp júrgen talantty rejısser, Memlekettik «Daryn» Jastar syılyǵynyń laýreaty Farhat Moldaǵalıdiń rejısserlik qoltańbasyna tıesili bolsa, qazaqtyń klassık jazýshysy Saıyn Muratbekovtiń 85 jyldyǵyna tamasha tartý bolǵaly turǵan «Jýsan ıisi» dramasyn sońǵy ýaqytta teatr keńistiginde esimi jıi atalyp júrgen elimizdegi jańashyl rejısserlerdiń biri Juldyzbek Jumanbaı sahnalady.
Ultymyzdyń úsh birdeı uly qalamgeriniń ádebı shyǵarmasyn sahna tilinde sóıletip gastroldik baǵdarlama básin bıiktetken ujym jumysy shyn máninde qyzyǵýshylyq týdyrady. Ásirese, talaı dodada top jaryp, teatr mamandarynyń joǵary baǵasyn alyp úlgergen «Qulager» saýnd-dramasynyń sahnalaný syny men syry bólek. Al kishkentaı kórermender úshin 16 qazan kúni oınalatyn orystyń áıgili «Jeti laq» ertegisiniń jelisinde jazylǵan Sh.Úmbetqalıevtiń «Týǵan kún» qoıylymy da 75 jyldyq tarıhy bar teatr gastroliniń ajaryn asha túseri sózsiz.