Qazaqstandyq tennısshiler Máskeýde Kreml kýbogy týrnırinde baq synaıdy, dep habarlaıdy Egemen.kz.
Qazaqstannyń birinshi, álemniń 16-raketkasy Elena Rybakına 18-24 qazan aralyǵynda ótetin Kreml kýbogy WTA 250 jarysyna qatysady. Dodanyń 7-raketkasy bolyp tirkelgen qazaqstandyq tennısshi alǵashqy aınalymda dúnıejúzilik reıtıngte 37-orynda turǵan chehııalyq Marketa Vondroýshovamen sheberlik baıqasady.
Júlde qory 565 myń AQSh dollarynan asatyn, pandemııaǵa baılanysty byltyr ótpeı qalǵan jarysqa 2019 jylǵy chempıon, shveısarııalyq Belında Benchıch qatyspaıdy. Erler arasyndaǵy osy týrnırde Qazaqstannyń birinshi, álemniń 37-inshi, dodanyń 5-raketkasy Aleksandr Býblıktiń qarsylasy keıin belgili bolady.
Júlde qory 697 myń AQSh dollarynan asatyn bul jarysta 2019 jyly reseılik Andreı Rýblev úzdik shyqqan bolatyn. Dúnıejúzilik reıtıngte besinshi satyda turǵan ol bıyl birinshi raketka bolyp tirkelgen.
Taǵy bir qazaqstandyq, reıtıngte 165-satydaǵy Dmıtrıı Popko irikteý saıystarynda álemniń 106-raketkasy, lıtvalyq Rıchardas Berankısten 4:6, 1:6 esebimen utylyp qaldy.