Elordaǵa irgeles Jibek joly aýylyndaǵy halqymyzdyń ardaqty perzenti, ánshi-kompozıtor Imanjúsip Qutpanuly atyndaǵy orta mektepte tuǵyrly tulǵaǵa arnalǵan shaǵyn mýzeı jumys isteıdi. Oǵan Imanjúsip atamyzdyń nemeresi, belgili ǵalym Raýshan Kóshenova bas-kóz bolyp otyr. Osynda arda azamatqa qatysty biraz jádiger saqtalǵan. Sonyń ishinen Imanjúsiptiń balasy Nurhanǵa syılaǵan ertoqymy týraly aıtsaq deımiz.
Bul jádiger jaıynda bizge Nurhan qarııanyń qyzy Raýshan áńgimelep berdi.
– Ákem maǵan kózi tirisinde eki amanat júktedi, – dep bastady sózin ol kisi. − Birinshisi – Imanjúsip atamnyń súıegi jatqan jerdi anyqtaý, ekinshisi – sýretin tabý. Búginde ákemniń eki amanaty oryndaldy. Atamnyń úsh uly, jeti qyzy bolǵan. О́zi atylǵannan keıin urpaqtary da kóp qýǵyn kórgen. Ákem óz ákesinen on jasynda jetim qaldy. Sodan bas saýǵalap О́zbekstanǵa barady, sol jaqtan maıdanǵa alynyp, soǵys aıaqtalǵannan keıin, ıaǵnı 1946 jyly ǵana elge oralyp, týystaryn izdep, taýyp alǵan.
Imanjúsip atam alpystan asqanda ákem ómirge kelipti. Sonda ol kisi aǵaıyndardy jınap, toı jasaǵan. Bir sheberge «balama syıym» dep bar jabdyǵymen aıshyqty ertoqym jasatqan. Bul ertoqym sol. Keıin «balapan basyna, turymtaı tusyna» deıtin qıyn ýaqyt týdy. Sol jyldary ertoqymdy ákemniń týǵan aǵasy Seıithan kókem saqtap qalyp, keıin baýyry elge aman-esen oralǵasyn ózine bergen. Ákem 1996 jyly dúnıeden ozdy. Keıin inim Seıitbek ertoqymdy, júgeni, jabýymen birge «atam atyndaǵy mektepte tursyn» dep mýzeıge tapsyrdy, – dedi tektiniń tuıaǵy.